საქართველოში აშშ-ის ყოფილ ელჩის, იან კელის კრიტიკული შეფასებების გამო, ქართული ოცნების აღმასრულებელი მდივანი, მამუკა მდინარაძე მას ნაციონალურ მოძრაობის "ღია ლობიზმში" ადანაშაულებს. მდინარაძის აზრით, კელის განცხადებები არავის დაუტოვებს იმის ფიქრის საშუალებას, რომ ის ობიექტურია.

"იან კელის განცხადებები ამ ბოლო დროს კიდევ უფრო რადიკალური და მწვავე ხდება და ეს ადამიანი ღია ლობიზმს უწევს ნაცმოძრაობას. არ მგონია ნაცმოძრაობის პოზიციის ასეთი აშკარა მხარდაჭერა, ასეთი უაპელაციო მხარდაჭერა, ამ ქვეყანაში თუნდაც ერთ ადამიანს, თუნდაც სუბიექტურად მოფიქრალს და მოაზროვნეს დაუტოვებს იმის ფიქრის საშუალებას, რომ ეს ადამიანი ერთ განცხადებას ან ერთ ფრაზას მაინც ობიექტურად აკეთებს", — განაცხადა მან.

საქართველოში აშშ-ის ყოფილი ელჩი იან კელი ხშირად აკრიტიკებს მმართველ გუნდს და მიიჩნევს, რომ ქვეყანა შორდება დასავლურ ორიენტაციას. გუშინ, 5 დეკემბერს, კელიმ ქართული ოცნების თავმჯდომარის, ირაკლი კობახიძის განცხადების პასუხად თქვა, რომ ის კელი დეგნანის მანდატსა და რეპუტაციასთან ბრძოლას ყოველთვის წააგებს.

2 დეკემბერს ირაკლი კობახიძემ განაცხადა, რომ თავად არის კონსტიტუციური სამართლის სპეციალისტი, აშშ-ს ელჩი კი არა. ასე უპასუხა მან საარჩევნო ბარიერის დაწევაზე უარის თქმაზე კელი დეგნანის კრიტიკას. კელი დეგნანმა ირაკლი კობახიძეს უპასუხა და თქვა, რომ საკონსტიტუციო სამართალში გამოცდილებას მასაც აქვს.