საქსტატის ინფორმაციით, ნოემბერში წლიური ინფლაციის მაჩვენებელი 12,5% იყო, რაც ნიშნავს იმას, რომ საქართველოში კვლავ მაღალი ინფლაციაა. აღსანიშნავია, რომ ნოემბერში 10 ყველაზე მეტად გაძვირებული პროდუქტიდან 6 სურსათს მიეკუთვნება. ამასთან, ყველაზე მეტად გაძვირებულ პროდუქტებს შორის მოხვდა ბენზინი და დიზელის საწვავი.

საქსტატის ინფორმაციით, წლიურ ინფლაციაზე ყველაზე დიდი გავლენა სურსათზე ფასების ზრდამ მოახდინა — ამ სასაქონლო ჯგუფში პროდუქცია წლიურად 17%-ით გაძვირდა და იქიდან გამომდინარე, რომ სურსათი ადამიანების სამომხმარებლო კალათის დიდ ნაწილს შეადგენს, მასზე ფასების ზრდამ ინფლაციაში 5,35%-იანი წვლილი შეიტანა. გარდა ამისა, 20,2%-ით არის გაძვირებული ტრანსპორტის ჯგუფში შემავალი პროდუქტები, რამაც ნოემბრის ინფლაციის მაჩვენებელი 2,5%-ით გაზარდა.

ამასთან, უნდა ითქვას, რომ ბოლო ერთი წლის ჭრილში ფასები გაზრდილია თითქმის ყველა სასაქონლო ჯგუფში გარდა კავშირგაბმულობისა.

ასეთია იმ 10 პროდუქტის ჩამონათვალი, რომელიც ნოემბერში წლიურად ყველაზე მეტად გაძვირდა:

  1. კომბოსტო — გაძვირდა 96,7%-ით;
  2. ბადრიჯანი — გაძვირდა 74,8%-ით;
  3. ქლიავი — გაძვირდა 58,4%-ით;
  4. თერმომეტრი — გაძვირდა 47,6%-ით;
  5. ბენზინი — გაძვირდა 44,7%-ით;
  6. ლურსმანი — გაძვირდა 43,7%-ით;
  7. კვერცხი — გაძვირდა 41,6%-ით;
  8. ყურძენი — გაძვირდა 41,4%-ით;
  9. მზესუმზირის ზეთი — გაძვირდა 40,8%-ით;
  10. დიზელის საწვავი — გაძვირდა 40,4%-ით.

გარდა ამისა, ფასები მომატებულია კიდევ 260 დასახელების პროდუქტსა და მომსახურებაზე. ამასთან, უნდა აღინიშნოს, რომ ნოემბერში, გასული წლის იმავე თვესთან შედარებით, გაიაფდა 25 დასახელების პროდუქტი.

შეგახსენებთ, რომ ოქტომბერში წლიური ინფლაცია 12,8% იყო, სექტემბერში — 12,3%, აგვისტოში — 12,8%, ივლისში — 11,9% იყო, ივნისში — 9,9%, მაისში — 7,7%, ხოლო აპრილსა და მარტში — 7,2%.

აღსანიშნავია, რომ ინფლაციის დარეგულირების მიზნით, საქართველოს ეროვნულმა ბანკმა აგვისტოს დასაწყისში რეფინანსირების განაკვეთი 0,5 პროცენტული პუნქტით, 10%-მდე გაიზარდა. მას შემდეგ სებ-მა ეს განაკვეთი ორჯერ დატოვა უცვლელად.

საერთაშორისო სავალუტო ფონდის პროგნოზით, მიმდინარე წლის ბოლოს საქართველოში 13,05%-იანი ინფლაცია იქნება და ამ მაჩვენებლით ქვეყანა მსოფლიოში მე-16 ადგილს დაიკავებს.

როგორც ცნობილია, სებ-ის მიერ დადგენილი ინფლაციის მიზნობრივი, ანუ დასაშვები დონე 3%-ია. ეროვნული ბანკი ინფლაციის მაჩვენებლის დარეგულირებას 2022 წლიდან ელოდება.

გაიგეთ მეტი: