ჰონგ-კონგის გადაღლილმა მოსახლეობამ დასვენების ახალ გზას მიაგნო: ადამიანები ფულს "არსაით მიმავალი" ავტობუსით მგზავრობაში იხდიან. 5-საათიანი ტურის განმავლობაში ნებისმიერ მსურველს ორსართულიან ავტობუსში გამოძინება შეუძლია. ერთი ბილეთის ღირებულება პირველ სართულზე $12, მეორეზე კი — $51-ია.

თითქმის 84-კილომეტრიანი მარშრუტი იმგვარადაა შექმნილი, რომ ავტობუსი საცობში არ მოხვდეს და დიდხანს არც შუქნიშანთან გაჩერება მოუწიოს, რათა ჩაძინებული მგზავრების მყუდროება რამემ არ დაარღვიოს.

ამ მომსახურებით ძირითადად ის ადამიანები სარგებლობენ, რომელთაც სახლში გამოძინება უჭირთ. ჩაძინებული მგზავრების გარდა, ავტობუსში ჰონგ-კონგის დათვალიერების მსურველებსაც ნახავთ.

"ალბათ, ყველას გვქონია შემთხვევა, როდესაც სახლში დაძინება გვიჭირს, მაგრამ ავტობუსის რხევა და ვიბრაცია ტკბილად ძილის შესაძლებლობას გვაძლევს. ჰონგ-კონგელებს სამსახურის, სახლის გადასახადების, ცხოვრების გამო სტრესი აქვთ. ახლა სამოგზაუროდ სიარულიც კი არ შეგვიძლია. ამის გამო, ვფიქრობ, გამოძინება უამრავ ჰონგ-კონგელს უჭირს", — ამბობს ერთ-ერთი მგზავრი.

მომსახურების პოპულარობის გათვალისწინებით, თამამად შეიძლება ითქვას, რომ მშვიდი ძილის შესაძლებლობა ნამდვილი ფუფუნებაა.