ინფექციური საავადმყოფოს დირექტორი, თენგიზ ცერცვაძე ფიქრობს, რომ მწვანე პასპორტისთვის აუცილებელი პირობა არა ზოგადად, არამედ ბოლო 6 თვეში კოვიდგადატანილის სტატუსი უნდა იყოს. ცერცვაძე ამ მოსაზრებას საერთაშორისო სტანდარტს აფუძნებს.

"ჩვენი დაკვირვებით და საერთაშორისო დაკვირვებით, გადატანილი კოვიდის შემდეგ რჩება იმუნიტეტი ექვსი თვე — შეიძლება ვიღაცას რჩება მეტი, ვიღაცას ნაკლები, მაგრამ საშუალოდ 6 თვე. ამიტომ, ჩემი აზრით, სამედიცინო ჩვენებით, გამართლეული იქნება, რომ მწვანე პასპორტის აუცილებელი პირობა იყოს — ვაქცინაციასთან ერთად ან PCR ტესტთან ერთად — არა ზოგადად კოვიდგადატანილის სტატუსი, არამედ ბოლო 6 თვეში კოვიდგადატანილის სტატუსი, როგორც ეს არის საზღვარგარეთ", — განაცხადა თენგიზ ცერცვაძემ.

ის ფიქრობს, რომ კოვიდგადატანილებისთვის მწვანე პასპორტის უვადოდ გაცემა თავის მოტყუებაა.

"ჩვენ ეს მწვანე პასპორტი თავის მოტყუებისთვის ხომ არ გვინდა?! ჩვენ ეს იმისთვის გვინდა, რომ დავიცვათ ადამიანები, დავიცვათ ერთმანეთი", — განაცხადა ცერცვაძემ.

1-ლი დეკემბრიდან ე.წ. მწვანე პასპორტები ამოქმედდება. ამის შესახებ პრემიერმინისტრმა ირაკლი ღარიბაშვილმა 8 ნოემბერს, საკოორდინაციო საბჭოს სხდომის შემდეგ განაცხადა. მან თქვა, რომ მსჯელობდნენ კოვიდგატანილებისთვის პასპორტზე შეზღუდვა ყოფილიყო 6 თვე, თუმცა პირადად მისი რეკომენდაცია იყო, რომ ამ კატეგორიაზე კოვიდპასპორტი უვადოდ გაეცათ და "საბჭომ გაიზიარა მისი წინადადება".

საკოორდინაციო საბჭოს სხვა წევრებს არ განუმარტავთ, რა სამედიცინო არგუმენტის საფუძველზე გაიზიარეს ღარიბაშვილის რეკომენდაცია. ჯანდაცვის მინისტრმა, ეკატერინე ტიკარაძემ ამ საკითხზე დასმული კითხვის საპასუხოდ ასეთი ახსნა შემოგვთავაზა:

"ზოგადად საქართველოსნაირი ქვეყანა მსოფლიოში მეორე არსად არ არის და ჩვენ ყველაფერში განსაკუთრებულები ვართ".

ეს ერთ-ერთი ფაქტორია, რის გამოც საქართველოში გაცემულ მწვანე პასპორტს ქვეყაქნაში და მის საზღვრებს გარეთ ყოველთვის თანაბარი წარმატებით ვერ გამოვიყენებთ.

გაიგე მეტი: