ექიმთა კონსილიუმის წევრის განცხადებით, ექსპრეზიდენტ მიხეილ სააკაშვილის ჯანმრთელობის მდგომარეობა დამაკმაყოფილებელია და ის ემზადება სასამართლოსთვის. ექიმის თქმით, სააკაშვილი იკვებება თითქმის სრული რაციონით და ფიზიკურად გააქტიურებულია.

"დღეისთვის პაციენტის მდგომარეობა დამაკმაყოფილებელია. აღინიშნება მცირე სისუსტე. ლაბორატორიული ანალიზები ნორმის ფარგლებშია. კვების რაციონი არის გაფართოებული და იკვებება თითქმის უკვე სრული მენიუთი. შედგენილია მენიუ ენდოკრინოლოგთან შეთანხმებით. ძალის აღდგენა მიდის. დაიწყო უკვე ფიზიკური გააქტიურება და ბატონი მიხეილი ემზადება სასამართლოსთვის", — განაცხადა მან.

ექიმი ფიქრობს, რომ თუ სააკაშვილის მდგომარეობა ხვალაც სტაბილურად გაგრძელდება, ის მზად იქნება სასამართლოზე დასასწრებად.

ცენტრ ემპათიას ხელმძღვანელის, მარიამ ჯიშკარიანის განცხადებით, მიხეილ სააკაშვილის არსებული ჯანმრთელობის მდგომარეობა მას სასამართლო სხდომაზე მონაწილეობაში ხელს არ შეუშლის.

მას შემდეგ, რაც სააკაშვილმა მხარდამჭერებს 29 ნოემბერს, თავისი სასამართლო პროცესის პარალელურად, საქალაქო სასამართლოს ეზოში შეკრებისკენ მოუწოდა, მისი ადვოკატები ხელისუფლებას მიმართავენ და აცხადებენ, რომ აქცია ექსპრეზიდენტის პროცესზე მიყვანაზე უარის თქმის საფუძველი არ უნდა გახდეს.

29 ნოემბერს სააკაშვილის მორიგი სასამართლო სხდომა გაიმართება, თუმცა უცნობია, დაესწრება თუ არა ის საკუთარ პროცესს. 22 ნოემბერს იუსტიციის მინისტრმა განაცხადა, რომ ვინაიდან ექსპრეზიდენტმა შიმშილობა შეწყვიტა, გამოირიცხა ერთი ფაქტორი, რომლის გამოც ის სასამართლოში არ მიჰყავდათ. მისივე თქმით, ექიმების შესაბამისი დასკვნის შემთხვევაში, შესაძლოა, შემდგომ სასამართლო პროცესზე დარბაზში მიიყვანონ.

ბრეგაძის მტკიცებით, სხდომაზე არ მიყვანას 2 მთავარი ფაქტორი ჰქონდა: უსაფრთხოება და სააკაშვილის ჯანმრთელობის მდგომარეობის მკვეთრად გაუარესების რისკი. ის ვრცლად საუბრობს მეორეზე, თუმცა დეტალურად არ განიხილავს პირველს — უსაფრთხოებას.