ევროპელი სოციალისტების დეპუტატმა ფრიდონ ინჯიამ იურიდიულ საკითხთა კომიტეტის სხდომაზე უზენაესი მოსამართლეობის კანდიდატ გენადი მაკარიძეს ჰკითხა, სამი შვილის გარდა კიდევ თუ ისურვებდა მისი ოჯახის გამრავლებას. გარდა ამისა, მან მაკარიძეს ჰკითხა, დემოგრაფიული პრობლემებიდან გამომდინარე, რამდენად მიაჩნია, რომ ზღვრული ასაკი ქორწინების ერთი წლით მაინც შემცირდეს.

"ბატონო გენად, თქვენ სამი შვილი გყავთ, ფიქრობთ კიდევ გამრავლდეს თქვენი ოჯახი? მე, მაგალითად, ვისურვებდი", — ჰკითხა ინჯიამ, რაზეც გენადი მაკარიძემ უპასუხა, რომ "ადამიანს რაც მეტი ჰყავს შვილი, მით უკეთესია ერისთვის, ქვეყნისთვის".

"გისურვებთ ჯანმრთელობას და გამრავლებას კიდევ. მოგეხსენებათ, რომ საქართველოში დემოგრაფიული პრობლემები არის. ზღვრული ასაკი ქორწინების რამდენად მიგაჩნია, შეიძლება შემცირდეს ერთი წლით მაინც?", — უთხრა ამის მერე დეპუტატმა.

ამაზე უზენაესი მოსამართლეობის კანდიდატმა უპასუხა, რომ არა.

"ვფიქრობ, რომ ის, რაც კანონმდებლობით არის დადგენილი საკმაოდ გონივრულია...", — განაცხადა მაკარიძემ.

დღეს საკანონმდებლო ორგანოში უზენაესი სასამართლოს მოსამართლეობის ორ კანდიდატს, გენადი მაკარიძესა და თამარ ოქროპირიძეს უსმენენ.