ექსპრეზიდენტ მიხეილ სააკაშვილის დედამ, გიული ალასანიამ შვილის ციხეში მონახულების შემდეგ განაცხადა, რომ მისი შვილი დათრგუნულია და არ არის ისეთი ძველებური, როგორსაც ადრე იცნობდნენ. მან, ასევე, საზოგადოებას მისი შვილის გასათავისუფლებლად აქტიურობისკენ მოუწოდა.

"ფსიქოლოგიური მდგომარეობა თვალშისაცემია. დათრგუნულია. არ არის ის ძველებური ადამიანი, რომელსაც ჩვენ ვიცნობდით. მთლიანობაში არის ადამიანი შეცვლილი. სიარული უჭირს", — თქვა ალასანიამ ჟურნალისტებთან.

გუშინ, 23 ნოემბერს კონსილიუმის ერთ-ერთმა წევრმა განაცხადა, რომ მისი გატარების მცდელობა პირველად იყო. კითხვაზე, უჭირს თუ არა სააკაშვილს გადაადგილება, ექიმმა უპასუხა, რომ შიმშილობის 50-დღიანი ვადის შემდეგ "ადამიანს აუცილებლად გაუჭირდებოდა" გადაადგილება. თუმცა აღნიშნა, რომ სააკაშვილის კლინიკური მდგომარეობა ბევრად უკეთესია.

მიხეილ სააკაშვილის გორის სამხედრო ჰოსპიტალში 5 დღეა იმყოფება. იქ გადაყვანა იუსტიციის სამინისტრომ 19 ნოემბერს შესთავაზა, რასაც ექსპრეზიდენტი დათანხმდა და შიმშილობა შეწყვიტა.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

ადამიანის უფლებათა ევროპული სასამართლოს ბოლო გადაწყვეტილებით ირკვევა, რომ სტრასბურგი 19 ნოემბერს სააკაშვილისთვის ადეკვატურ მკურნალობას ითხოვდა.