ორგანიზაცია Trace International-მა ბიზნეს კორუფციის რისკი მსოფლიოს 194 ქვეყანაში შეაფასა და 100-ქულიანი სისტემით საქართველოს 26 ქულა მიანიჭა, რის შედეგადაც ქვეყანამ 29-ე ადგილი დაიკავა. 2020 წელთან შედარებით საქართველოსთვის ეს ერთი პოზიციით გაუარესებული მაჩვენებელია, რადგან გასულ წელს ქვეყანა 194 სახელმწიფოს შორის 25 ქულით 28-ე ადგილს იკავებდა.

IDFI-ის ინფორმაციით, ბოლო ხუთი წლის განმავლობაში საქართველომ საუკეთესო მაჩვენებელი 2017 წელს დააფიქსირა, როცა ქვეყანამ 200 სახელმწიფოს შორის 23 ქულით, 25-ე ადგილი დაიკავა.

თუ ბოლო პერიოდის მონაცემებს შევხედავთ, ვნახავთ, რომ ბოლო წლების განმავლობაში ბიზნესის კორუფციის რისკი ეტაპობრივად იმატებს.

როგორც Trace International-ის რეიტინგი აჩვენებს, ბიზნესის კორუფციის რისკის ყველაზე დაბალი მაჩვენებელი დანიაშია — შესაბამისად, ქვეყანა ორი ქულით რეიტინგში პირველ ადგილს იკავებს. ბიზნესის კორუფციის ყველაზე მაღალი რისკი კი გამოვლინდა ჩრდილოეთ კორეაში, რომელიც რეიტინგში 94 ქულით ბოლო — 194-ე ადგილზეა. აღსანიშნავია, რომ 100 ქულა კორუფციის მაღალ, ხოლო 0 ქულა კორუფციის დაბალ რისკზე მიუთითებს.

Trace International-ის 2021 წლის ბიზნესის კორუფციის რისკის ინდექსის მიხედვით ყველაზე დაბალი კორუფციული რისკის მქონე ქვეყნების ხუთეულში შედის:

  1. დანია — 2 ქულა;
  2. ნორვეგია — 5 ქულა;
  3. შვედეთი — 7 ქულა;
  4. ფინეთი — 7 ქულა;
  5. ახალი ზელანდია — 8 ქულა.

რაც შეეხება საქართველოს მეზობელ ქვეყნებსა და აღმოსავლეთ ევროპის რეგიონს, საუკეთესო ქულა ჩეხეთის რესპუბლიკამ დაიმსახურა და 31 ქულით 39-ე ადგილი დაიკავა. ყველაზე მაღალი რისკი კი ბელარუსში დაფიქსირდა, რომელმაც 58 ქულით 144-ე ადგილი დაიმსახურა.

Trace International-ის ბიზნესის კორუფციის რისკის რეიტინს ოთხი მაჩვენებლის მიხედვით ითვლს: კორუფციული შესაძლებლობა, კორუფციული რისკების აღკვეთა, გამჭვირვალობა და ზედამხედველობა.

განხილული მიმართულებებიდან კორუფციის ყველაზე დაბალი შეფასება საქართველომ კორუფციის შესაძლებლობაში (19 ქულა) მიიღო. კორუფციის ყველაზე მაღალი რისკის მქონედ შეფასდა და, შესაბამისად, ყველაზე მაღალი ქულა დაფიქსირდა კორუფციული რისკების აღკვეთაში (38 ქულა). რაც შეეხება გამჭვირვალობასა და ზედამხედველობას, აღნიშნულ მიმართულებებში საქართველომ, შესაბამისად, 28 და 29 ქულები აიღო.