სახალხო დამცველის, ნინო ლომჯარიას განცხადებით, ექიმების მიერ გაცემული ყველა რეკომენდაცია უნდა შესრულდეს და ყოფილი პრეზიდენტი მიხეილ სააკაშვილი მრავალპროფილურ კლინიკაში უნდა გადაიყვანონ.

"ახლა, რაც მთავარია, უნდა შესრულდეს ის რეკომენდაცია, რაც ექიმებმა გასცეს — დაუყოვნებლივი გადაყვანა იმ მრავალპროფილის სამედიცინო დაწესებულებაში,სადაც იქნება ტექნიკურად შესაძლებელი ასეთი პაციენტის მკურნალობა", — თქვა ლომჯარიამ ფორმულასთან.

სახალხო დამცველმა აღნიშნა, რომ ესაუბრა ექსპრეზიდენტს და სთხოვა, განეხილა ყველა შესაძლო ვარიანტი, გარდა მე-18 დაწესებულებისა. როგორც ლომჯარია ამბობს, ყოველი წუთი არის კრიტიკული.

18 ნოემბერს, ექსპრეზიდენტ მიხეილ სააკაშვილის ადვოკატმა, ბექა ბასილაიამ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა და გადააწვინეს საწოლზე", ამასთან მან თქვა, რომ ხელით გაუხსნეს თვალები. ამის შემდეგ პენიტენციურმა გაავრცელა განცხადება და თქვა, რომ სააკაშვილის მდგომარეობა სტაბილურია და "ცოტა ხანში ექიმი რეანიმატოლოგი გააკეთებს კომენტარს მედიისთვის". რეანიმატოლოგმა კი თქვა, რომ ექსპრეზიდენტი რეანიმაციაშია. მისივე თქმით, პაციენტმა მცირე ხნით გონება დაკარგა. ასევე, ჰქონდა მაღალი წნევა და ახლა "აბსოლუტურად სტაბილურ" მდგომარეობაშია.