რუსეთის ფედერაციის მოქმედი სახელმწიფო მრჩეველი ინალ არძინბა ოკუპირებული აფხაზეთის დე ფაქტო საგარეო საქმეთა მინისტრი გახდა. შესაბამისი ბრძანებას აფხაზეთის ე.წ. პრეზიდენტმა, ასლან ბჟანიამ ხელი დღეს, 17 ნოემბერს მოაწერა.

არძინბა 1990 წელს სოხუმში დაიბადა. არის მოსკოვისა და სრულიად რუსეთის საპატრიარქოში ახალგაზრდობის საქმეების საბჭოს თავმჯდომარე. 2014–2018 წლებში მუშაობდა დსთ-ს ქვეყნებთან, აფხაზეთთან და სამხრეთ ოსეთთან სოციალურ-ეკონომიკური თანამშრომლობის სამმართველოში.

გარდა ამისა, ის ოკუპირებული აფხაზეთის პირველი პრეზიდენტის, ვლადისლავ არძინბას ნათესავია.

უკრაინული მედია მას უკრაინაში ქვეყნის დესტაბილიზაციის გეგმის უშუალო ლიდერს უწოდებს. კერძოდ, მას ბრალი ედება უკრაინის სახელმწიფო საზღვრის შეცვლის მომზადებაში, თანამოაზრეების დაქირავებაში და ოდესის ოლქის ტერიტორიაზე სუვერენული სახელმწიფო "ბესარაბიის" ფორმირების უკანონო გამოცხადების წინაპირობების შექმნაში, აგრეთვე, ტერორისტულ ორგანიზაციაში მონაწილეობაში.

რაც შეეხება ყოფილ ე.წ. საგარე საქმეთა მინისტრს, განცხადებაში ნათქვამია, რომ დაურ კოვე თანამდებობიდან სხვა სამუშაოზე გადაყვანის გამო გაათავისუფლეს.