29 სექტემბერი ამერიკელი პოპვარსკვლავის, ბრიტნი სპირსისა და მისი ფანებისთვის ნამდვილად ისტორიულ თარიღად იქცევა. 13-წლიანი ბრძოლის შემდეგ ბრიტნიმ საბოლოო გამარჯვებას მიაღწია — ლოს-ანჯელესის უზენაესმა სასამართლომ მომღერლის მამას, ჯეიმი სპირსს, მეურვეობა ჩამოართვა.

მოსამართლე ბრენდა პენის გადაწყვეტილებით, მეურვის პოზიციას დროებით, 31 დეკემბრამდე, ბრიტნისა და მისი ადვოკატის მიერ შერჩეული პირი, ჯონ ზეიბელი, დაიკავებს.

"ამჟამინდელი სიტუაცია გაუმართლებელია", — განაცხადა პენიმ ორივე მხარის არგუმენტების მოსმენის შემდეგ, — "ეს ტოქსიკურ გარემოზე მეტყველებს, რაც ჯეიმი სპირსის მეურვეობისგან ჩამოშორებას მოითხოვს".

სასამართლო მოსმენას ბრიტნი არ ესწრებოდა, თუმცა, მისი ინტერესების დამცველი ადვოკატი მეთიუ როუზენგარტი იყო. მან ჯეიმის მეურვეობის სრულად შეწყვეტა 30-დან 45 დღის ვადაში მოითხოვა და განაცხადა, რომ ბრიტნის კეთილდღეობისთვის ასეა საჭირო.

"მეურვეობა შეიძლება და უნდა დასრულდეს დაუყოვნებლივ, უკეთესი იქნება, თუკი ეს ამ შემოდგომაზევე მოხდება".

ადვოკატმა დასძინა, რომ ჯეიმი "სასტიკი, ტოქსიკური და მოძალადე კაცია", თავის კლიენტს კი სურს, მისგან "დღესვე" გათავისუფლდეს.

"ბრიტნი იმსახურებს, ხვალ მამის მეურვეობისგან თავისუფალმა გაიღვიძოს", — აღნიშნავს როუზენგარტი, — "ეს არის ის, რაც ჩემს კლიენტს უნდა და სჭირდება. ეს არის ის, რასაც იგი იმსახურებს".

ადვოკატმა ასევე განაცხადა, რომ ჯეიმი "წარმოუდგენელ" რაღაცებს სჩადიოდა. მისი თქმით, ბრიტნის ფულით მამამისმა დაცვა დაიქირავა, მომღერლის საძინებელში კი მოსასმენი აპარატი დაამონტაჟა.

ფოტო: Valerie Macon / AFP / Getty Images

ბრიტნი სპირსი თავისუფლების მოსაპოვებლად უკვე წლებია, იბრძვის. 2008 წლის შემდეგ მომღერლის მეურვე მამამისი გახდა, რომელიც 13 წლის განმავლობაში ბრიტნის პირად ცხოვრებას, კარიერასა და ფინანსებს განკარგავდა. ბოლო წლებში მომღერლის ფანებმა მოძრაობა #FreeBritney ("თავისუფლება ბრიტნის") შექმნეს და აცხადებდნენ, რომ ბრიტნი მკაცრი კონტროლის ქვეშ იყო, მისი თავისუფლება კი უსაფუძვლოდ შეზღუდეს.

სასამართლოს ერთ-ერთ მოსმენაზე მომღერალმა ეს მოსაზრებები დაადასტურა: მაგალითად, მისი თქმით, თურმე უკრძალავდნენ შვილის გაჩენას, წამლებით აბრუებდნენ და მამამისი სასამართლოს მიერ მინიჭებული მეურვის უფლებებს ბოროტად იყენებდა.

"ეს მეურვეობა ძალადობრივია. ჩემი ცხოვრების დაბრუნება მინდა", — განაცხადა მაშინ ბრიტნიმ.

ბრიტნი სპირსი მშობლებთან ერთად

ფოტო: Splash News

2021 კი ბრიტნისთვის ყველაზე რთული, თუმცა, გამარჯვებებით აღსავსე წელი გახდა. ჯერ დოკუმენტური ფილმი, Framing Britney Spears, გამოვიდა, რომელსაც ცნობილი ადამიანებისა და ფანებისგან დიდი მხარდაჭერის მიღება მოჰყვა. ამის შემდეგ მომღერალს გამარჯვების იმედი მიეცა.

იმედი კი ყოველ ჯერზე იზრდებოდა. აპრილის თვეში ბრიტნიმ სასამართლოს მოსმენაზე სიტყვით გამოსვლის უფლება მოიპოვა, ივნისში ღიად ისაუბრა მეურვეობისგან მიყენებულ ტრავმაზე, ივლისში კი, სასამართლოს გადაწყვეტილებით, ადვოკატის დაქირავების შესაძლებლობაც მიიღო.

მას მერე მეურვეობისგან გათავისუფლების პროცესი დაჩქარდა. ჯეიმი სპირსი ჯერ შვილის მეურვეობას ჩამოშორებას დათანხმდა, მოგვიანებით კი სასამართლოს თავად სთხოვა აღნიშნული გადაწყვეტილების მიღება.

სულ ცოტა ხნის წინ ამერიკელი პოპვარსკვლავი დაინიშნა, 39 წლის ასაკში კი პირველად შეძლო, iPad ეყიდა.