დეპუტატი ვახტანგ მეგრელიშვილი აცხადებს, რომ ექსპრეზიდენტი მიხეილ სააკაშვილი თავისი ნებით ახორციელებს პოლიტიკურ აქტს — შიმშილობს და ამით რისკავს ქვეყნის სტაბილურობას. ის ამბობს, რომ უფრო მეტად ნერვიულობს, მაგალითად, იმ ადამიანებზე, ვინც კანაფის მოხმარების გამო ზის ციხეში, ვიდრე მიხეილ სააკაშვილზე.

"ეს ადამიანი ხომ თავის პოლიტიკურ აქტს ახორციელებს, თავის ნებით, დამოუკიდებლად, თავისი თავისუფალი ნებით. მე შემიძლია უბრალოდ ზოგადად შევაფასო, მაგრამ, საერთოდ არ არის, ჩემი აზრით, ჩემი აზრი საინტერესო. თავისი ნებით რაღაცა მძიმე მდგომარეობაში იგდებს თავს. ამით რისკავს მთელი ჩვენი ქვეყნის სტაბილურობას. მე შეიძლება სტაბილურობაზე ვინერვიულო, მაგრამ, ხომ არ მომეთხოვება, რომ ამ ადამიანზე ვინერვიულო?! მორალურად, ვკითხულობ, მომეთხოვება? მომეთხოვება? მაინტერესებს [...]

80 ადამიანი გვიკვდება კოვიდით ყოველ დღე, ჩვენს სტატისტიკას თუ დავუჯერებთ, ხომ?! კანონპროექტზე რომ გელაპარაკებით, ჩემი საქმე მაინტერესებს-მეთქი, ამ წამს 84 ადამიანი ზის ციხეში ლეგალურ მცენარეზე, მე ვნერვიულობ 84 ადამიანზე უფრო მეტად, მაპატიეთ, ვიდრე მიხეილ სააკაშვილზე", — განაცხადა ვახტანგ მეგრელიშვილმა პალიტრანიუსის ეთერში.

კითხვას, სჯერა თუ არა, რომ მიხეილ სააკაშვილი შიმშილობს, მეგრელიშვილმა ასე უპასუხა:

"არ მჯერა ბევრი რამე. ბევრი რამე არ მჯერა, ბევრი რამე შეუსაბამოა ერთმანეთთან".

დამაზუსტებელი კითხვის შემდეგ მეგრელიშვილმა განაცხადა:

"თუ მოკვდა, მაშინ ვიტყვი, რომ შევცდი".

მიხეილ სააკაშვილი 48-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.