დღეს საქალაქო სასამართლომ რუსუდან კერვალიშვილსა და მაია რჩეულიშვილს ექვს-ექვსი წლით თავისუფლების აღკვეთა მიუსაჯა, რომელიც 2012 წლის 28 დეკემბრის "ამნისტიის შესახებ" საქართველოს კანონის გამოყენებით შეუმცირდათ 1/3-ით და საბოლოოდ სასჯელის სახედ და ზომად განესაზღვრათ 4 წლის ვადით თავისუფლების აღკვეთა

პროკურატურა აცხადებს, რომ როგორც გამოძიების ეტაპზე, ისე საქმის სასამართლოში განხილვისას გამოხატავდა მზაობას ბრალდებულებთან გაეფორმებინა საპროცესო შეთანხმება პირობით მსჯავრზე, ბრალდებულების მხრიდან 6000-მდე დაზარალებულისთვის მიყენებული ზიანის სრულად ანაზღაურების შემთხვევაში:

"მიუხედავად იმისა, რომ საქმის განხილვა სასამართლოში მიმდინარეობდა თითქმის ოთხი წლის განმავლობაში, ბრალდებულების მხრიდან არ მოხდა ზიანის ანაზღაურება და სამშენებლო ობიექტების დასრულება".

პროკურატურა აცხადებს, რომ მთლიანობაში, მოცემულ საქმეზე, მაია რჩეულიშვილი და რუსუდან კერვალიშვილი როგორც თაღლითურად, ასევე მითვისების გზით დაეუფლნენ 5 548 341 აშშ დოლარსა და 20 692 408 ლარს.

სასამართლოს მიერ მიღებული განაჩენის სამოტივაციო ნაწილის გაცნობის შემდეგ, ბრალდების მხარე იმსჯელებს გამამართლებელ ნაწილში სააპელაციო წესით გასაჩივრების თაობაზე.

რუსუდან კერვალიშვილის შვილი ნინო დარასელი განაჩენის სააპელაციოში გასაჩივრებას აპირებს. "სასამართლოს გადაწყვეტილებით დაზარალებულები კიდევ უფრო დაზარალდნენ - აცხადებს ის.