ხაქართველოს პრემიერმინისტრი, ირაკლი ღარიბაშვილი მოსახლეობას ტოლერანტობის საერთაშორისო დღეს ულოცავს და "სიკეთეს სიყვარულსა და ურთიერთპატივისცემას" უსურვებს. განცხადებაში ის ამბობს, რომ ადამიანი, მისი ღირსება და უფლებები კაცობრიობისთვის უმთავრესი ღირებულებაა.

"დღევანდელი დღე კიდევ ერთხელ გვახსენებს, რომ თანასწორობისა და ტოლერანტობის პრინციპებზე დაფუძნებული საზოგადოება დემოკრატიული სიმტკიცის მყარი საფუძველია.
ურთიერთპატივისცემა და შემწყნარებლობა ის ფუნდამენტური ფასეულობებია, რამაც ჩვენი ქვეყნის მრავალკულტურული, მრავლეთნიკური და მრავალკონფესიური მოსახლეობისთვის საქართველო სამშობლო გახადა და ამავდროულად უზრუნველყო მათი იდენტობის შენარჩუნება", — ვკითხულობთ განცადებაში.

პრემიერმინისტრი ამბობს, რომ საქართველო, როგორც ევროპული ქვეყანა პატივს სცემს და იზიარებს ერთიან ევროპულ ფასეულობებს, სადაც ადამიანის საყოველთაოდ აღიარებული უფლებების და ფუნდამენტური თავისუფლებების დაცვა გარანტირებულია კონსტიტუციით.

"ჩვენ პატივს ვცემთ და მხარს ვუჭერთ თითოეული მოქალაქის ღირსებას და თავისუფლებას", — ამატებს ის დასასრულს.

პრემიერმინისტრი არაერთხელ გააკრიტიკეს, სიძულვილის ენის შემცველი რიტორიკის გამო, რომელსაც ოპონენტების მიმართ იყენებს და მოუწოდეს, პატივისცემა გამოეჩინა ოპოზიციური პარტიების მიმართ. გარდა ამისა, მას და მის მთავრობას როგორც ადგილობრივი პოლიტიკოსები, ასევე ევროპარლამენტარბი ხშირად აკრიტიკებენ ევროპული ფასეულობების უარყოფისა და ადამიანის ფუნდამენტური უფლებების არდაცვის გამო.