დღეს, პლენარულ სხდომაზე პარტია ლელოს თავმჯდომარის, მამუკა ხაზარაძის მანდატის შეწყვეტის საკითხს უყრიან კენჭს. საპროცედურო საკითხთა და წესების კომიტეტმა ხაზარაძისთვის მანდატის შეწყვეტაზე დღეს დილით იმსჯელა და შესაბამისი დასკვნა ბიუროს გადაუგზავნა. კომიტეტის თავმჯდომარის, ირაკლი ქადაგიშვილის თქმით ხაზარაძემ მათ შესაბამისი მოთხოვნით 4 ნოემბერს მიმართა.

საპროცედურო საკითხთა და წესების კომიტეტმა მსგავსი დასკვნა გუშინ პარტია გირჩი — მეტი თავისუფლების ლიდერის, ზურაბ ჯაფარიძის შესახებაც მოამზადა. მისთვის მანდატის შეწყვეტის საკითხზე კენჭისყრაც დღევანდელ პლენარულ სხდომაზე გაიმართება.

ხაზარაძემ მანდატის დატოვების შესახებ გადაწყვეტილება 31 ოქტომბერს, ადგილობრივი თვითმმართველობის არჩევნების მეორე ტურის შედეგების საპროტესტო აქციაზე გაასაჯაროვა.

"აზრი არ აქვს იმ ადამიანებთან საქმის კეთებას, რომელიც ზურგში დანას გირტყამს და ხმას გართმევს. ამიტომ მივიღე გადაწყვეტილება, მე ვტოვებ პარლამენტს", — განაცხადა ხაზარაძემ.

აღსანიშნავია, რომ დღევანდელ სხდომას "პოლიტიკური შეხედულებების გამო" ბოიკოტს უცხადებენ ნაციონალური მოძრაობა და ლელო, ასევე დამოუკიდებელი დეპუტატი, დავით ბაქრაძე.