პენიტენციურმა სამსახურმა მორიგი ვიდეო გაავრცელა, სადაც ამტკიცებს, რომ გლდანის მე-18 დაწესებულება სამკურნალოდ სრულად აღჭურვილია იმისთვის, რომ მიხეილ სააკაშვილს სათანადო მეთვალყურეობა და მკურნალობა ჩაუტარდეს. მათი თქმით, საუბარი დაწესებულების არასათანადო სამედიცინო აღჭურვილობის შესახებ საზოგადოების "შეცდომაში შეყვანის მცდელობაა".

მათი თქმით, მე-18 დაწესებულება სტაციონარული ტიპის დაწესებულებაა, რომელიც დაკომპლექტებულია სხვადასხვა მაღალკვალიფიციური სპეციალისტით. ამასთან, პენიტენციურის ინფორმაციით, საჭირო აპარატურით სრულად აღჭურვილია ლაბორატორია, სადაც შესაძლებელია დიაგნოსტიკა, როგორც კლინიკური და ბიოქიმიური, ასევე, იმუნოლოგიური და სეროლოგიური მიმართულებით.

"საყურადღებოა ისიც, რომ კლინიკაში ფუნქციონირებს საოპერაციო ბლოკი, რომელიც დაკომპლექტებულია ყველა საჭირო ტექნიკით, მათ შორის, საანესთეზიო აპარატით, კარდიომონიტორით, ხელოვნური სუნთქვის აპარატით და სხვ.

დაწესებულებაში ბრალდებულების/მსჯავრდებულების კვალიფიციური სამედიცინო მომსახურების მიზნით, შეუფერხებლად ფუნქციონირებს თანამედროვე აპარატურით აღჭურვილი რეანიმაცია. ასევე, დამონტაჟებულია კომპიუტერული ტომოგრაფი და ფუნქციონირებს ჰემოდიალიზის აპარატი", — აღნიშნავენ ისინი.

მათივე ცნობით, დაწესებულებაში შესაძლებელია ჩატარდეს ეზოფაგოგასტროდუოდენოსკოპია, სპირომეტრია, ულტრასონოგრაფიული გამოკვლევა. პენიტენციურის ინფორმაციითვე, ის შეუფერხებლად, ცენტრალიზებულად მარაგდება ჟანგბადით და ამისთვის დაწესებულების ტერიტორიაზე სპეციალური "ქარხანაც" ფუნქციონირებს.

"აღსანიშნავია ისიც, რომ დაწესებულების მედპერსონალი ბრალდებულების/მსჯავრდებულების ჯანმრთელობის დაცვისა და კორონავირუსის გავრცელების პრევენციის მიზნით, უზრუნველყოფილია კოვიდრეგულაციებით გათვალისწინებული ყველა აუცილებელი საშუალებით (ინდივიდუალური დაცვის საშუალებები, სადეზინფექციო ხსნარი და სხვ.) დაწესებულების პერსონალს ინტენსიურად, ყოველკვირეულად უტარდება PCR ტესტირება, ასევე შუალედური ტესტირება სწრაფი/მარტივი მეთოდით", — აცხადებენ პენიტენციურ სამსახურში.

მიხეილ სააკაშვილი 47-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

სააკაშვილის სამოქალაქო კლინიკაში გადაყვანის მოთხოვნით პეტიციაც შეიქმნა. ხელმომწერები პირობას დებენ, რომ იქამდე, სანამ სააკაშვილი ამ კლინიკაში იქნება, ტერიტორიასთან აქციას არ გამართავენ.