ქართული ოცნების დეპუტატი, ირაკლი ქადაგიშვილი აცხადებს, რომ მიხეილ სააკაშვილის ჯანმრთელობის მდგომარეობა "არავის აინტერესებს". პარლამენტის წევრი შიმშილობას ბრჭყალებში მოიხსენიებს და აცხადებს, რომ მიზანი მისი ციხიდან გამოყვანაა.

"აქ ჩვენ ერთი რამე მარტივად უნდა გავიგოთ. მიხეილ სააკაშვილის ჯანმრთელობა არავის არ აინტერესებს, მე მგონი საკუთარ მშობელსაც კი არ აინტერესებს. გამომდინარე იქიდან, რომ მისი ეს ბრჭყალებში შიმშილობა, ჯანმრთელობის მდგომარეობა და ამაზე სპეკულირება ემსახურება ერთ რამეს, რომ რამენაირად მსჯავრდებული სააკაშვილი გამოიყვანონ ციხიდან. აი ეს არის მთელი ამ ვაკხანალიის მიზანი და მეტი არაფერი. ამიტომ მის ჯანმრთელობაზე თუ მართლა ვინმე რეალურად ზრუნავს, ეს არის ის ექიმები და ის პენიტენციური სისტემა, სადაც მიხეილ სააკაშვილია", — განაცხადა დეპუტატმა.

ირაკლი ქადაგიშვილი რევოლუციურ სცენარზე, დესტაბილიზაციაზე საუბრობს და აღნიშნავს, რომ ოჯახის წევრები, ასევე, ნაციონალური მოძრაობის წარმომადგენლები მიხეილ სააკაშვილს შიმშილობის შეწყვეტისკენ არ მოუწოდებენ, რადგან "რაც უფრო დამძიმდებოდა სააკაშვილის მდგომარეობა, მით უფრო ადვილი გახდებოდა, მათი გაგებით, ამ მიზნების მიღწევა".

"ყველა მისი სასიცოცხლო მაჩვენებელი და ჯანმრთელობის მაჩვენებელი არის სტაბილური. 50-დღიანი შიმშილობის დროს ასეთი რამეები არ ხდება, ეს ყველაფერი არის სპეკულაცია", — აცხადებს ის