გასულ წელს გავიგეთ, რომ ხატია ბუნიათიშვილი მსოფლიოში ერთ-ერთი ყველაზე ცნობილი ძვირფასეულობის ბრენდის, Cartier-ის სახე გახდა.

სულ ცოტა ხნის წინ კი ქართველი პიანისტისა და საუკუნოვანი ისტორიის მქონე ამ ფრანგული კომპანიის თანამშრომლობით ახალი სარეკლამო რგოლი გამოვიდა, რომელშიც ხატია ბუნიათიშვილთან ერთად მონაწილეობას იღებენ სხვა ისეთი ცნობილი სახეებიც, როგორებიც არიან მონიკა ბელუჩი, ლილი კოლინზი, უილოუ სმიტი და მეისი უილიამსი.

ვიდეორგოლის სახელწოდებაა LOVE IS ALL (სიყვარული ყველაფერია) და როგორც აღწერიდან ვიგებთ, მისი მიზანია "გულწრფელი პატივი მიაგოს უნივერსალურ და მარადიულ სიყვარულს".

Cartier-ის თითქმის ორწუთიან რეკლამაში სხვადასხვა სფეროს სულ 12 მსოფლიო ვარსკვლავი იღებს მონაწილეობას: მათ შორის სერიალ Game of Thrones-ის მსახიობი მეისი უილიამსი, მომღერალი უილოუ სმიტი, ჰონგკონგელი რეპერი ჯექსონ უონგი, მსოფლიოში აღიარებული ქართველი პიანისტი ხატია ბუნიათიშვილი და ლეგენდარული მონიკა ბელუჩი.

გავრცელებული ინფორმაციით, ვიდეოს გადაღებები მიმდინარეობდა პარიზში, ლოს-ანჯელესსა და შანხაიში.

ფოტო: Cartier