ექსპრეზიდენტის ადვოკატის, შოთა თუთბერიძის განცხადებით, ექიმების კონსილიუმი გლდანის ციხესთან მიხეილ სააკაშვილის სანახავად მივიდა, თუმცა ორსათიანი ლოდინის შემდეგ ისინი არ შეუშვეს, იმ მოტივით, რომ არასამუშაო საათები იყო. მისივე თქმით, კონსილიუმი აქამდე უკვე ყოფილა ასეთ სააკაშვილთან, ხოლო დღეს ასევე არასამუშაო საათებში სააკაშვილის სანახავად შევიდა კონსილიუმის წევრი და პირადი ექიმი, ნიკოლოზ ყიფშიძე.

"პენიტენციური სამსახურის ეს ნაბიჯი არის აბსოლუტურად უკანონო და სამარცხვინო. რაც შეეხება თავად ფაქტს, დაცვის მხარის პოზიციით, ეს ფაქტი კიდევ ერთხელ ადასტურებს იმას, რომ ხელისუფლება ჯიბრში უდგას ილუზორულ მოწინააღმდეგეს და ყველანაირად ცდილობს მესამე პრეზიდენტის უფლებების შეზღუდვას", — განაცხადა მან.

თუთბერიძის თქმით, არ აქვს ინფორმაცია, როდის შეუშვებენ ექიმებს, თუმცა ისინი მზად არიან, რომ კიდევ სცადონ სააკაშვილთან შესვლა.

დღის განმავლობაში მედიასაშუალებები ამბობდნენ, რომ კონსილიუმის წევრებს პენიტენციური სამსახურიდან აცნობეს, თითქოს ექსპრეზიდენტს მათთან შეხვედრა არ სურს. სააკაშვილის ნახვის შემდეგ თუთბერიძემ განაცხადა, რომ ეს სიცრუეა, სააკაშვილი თანახმაა და კონსილიუმს აცნობეს მისი პოზიცია, ამიტომ ექიმებს დღესვე ელოდებოდნენ.

"სააკაშვილი ცხადია ითხოვს პარიტეტული კონსილიუმის დაუყოვნებლივ ფორმირებას და რაც შეიძლება სწრაფად შესვლას ციხეში, თუმცა ის არ ეწინააღმდეგება არცერთი წუთით ამჟამად არსებული კონსილიუმის ვიზიტს. მზად არის შეხვდეს მათ, როგორც მთლიანი კონსილიუმის შემადგენლობას, ასევე ინდივიდუალურად", — განაცხადა მან.

დღეს, 14 ნოემბერს სახალხო დამცველმა განაცხადა, რომ სახალხო დამცველის აპარატი ვერ ჩაანაცვლებს სახელმწიფოს პასუხისმგებლობას პატიმრის ჯანმრთელობაზე ზრუნვის კონტექსტში და ვერ განსაზღვრავს პაციენტის მკურნალობის ტაქტიკას. სავარაუდოდ, ასე უპასუხა მან მიხეილ სააკაშვილის და ადვოკატების სურვილს, მისი ეგიდით შეიქმნას ახალი კონსილიუმი პარიტეტული მოტივებით.