ნაციონალური მოძრაობის თავმჯდომარე ნიკა მელია საზოგადოებისადმი მიმართვას ავრცელებს და აცხადებს, რომ ახლა აღარაა დრო მხოლოდ სოციალური ქსელების, არც პასიური ნერვიულობისა და გულშემატკივრობის, ან მთავრობის დამუნათების. მისი განცხადებით, დამუნათება შეიძლება იმის, ვისაც მილიგრამი სინდისი მაინც შერჩა და ქართულ ოცნებას არ ესმის სხვა ენა გარდა ქუჩაში გამოსული მოქალაქისა.

"ვისაც სიამოვნებს საკუთარი ქვეყნის სიმბოლოს თრევა და შეურაცხყოფა, ვისაც სიამოვნებს ადამიანის დამცირება და სიკვდილი — მათი გადარწმუნება შეუძლებელია! ისინი უნდა დავამარცხოთ! უნდა დავამარცხოთ ერთად!

რას იზამს ოპოზიცია? ოპოზიცია შენ ხარ! ყოველი თქვენგანისგან შედგება საზოგადოება რომელმაც უნდა გაიმარჯვოს! ქუჩებში გამოსვლის დროა!" — წერს ის.

როგორც მელია აცხადებს, თუ საზოგადოება დღეს არ გადადებს ყველაფერს, არ დადგება მყარად და მთელ მსოფლიოს არ გააგონებს ხმას, ხვალ ინანებს, რომ თვალწინ მოკლეს ქვეყნის პერსპექტივა და ჩაათრიეს რუსულ ჭაობში.

"ამათი ენა სამოქალაქო ომის ენაა და ამის გაჩერება მხოლოდ ათიათასობოთ ჩვენი მოქალაქის მტკიცე, მწვავე და არაძალადობრივ პროტესტს შეუძლია! გულით გინდა ქვეყნისთვის კარგი? – გამოდი ქუჩაში. გულით გინდა რომ არ თელავდნენ ქვეყნის ღირსებას? — გამოდი ქუჩაში. გულით გინდა მკვლელობას არ გაყურებინონ? — გამოდი ქუჩაში!

სისტემა უკვე ირყევა და და შენი ქუჩაში გამოსვლით ჩამოინგრევა კიდეც! ახლა მთავარია ჩვენი სიმტკიცე და დაუღლელობა — არ არსებობს ცალკე ოპოზიცია!" — წერს ის.

ნიკა მელიამ არაერთხელ განაცხადა, რომ მუდმივი პროტესტის დროა და დასრულდა ერთჯერადი მრავალრიცხოვანი აქციებით ბრძოლის ეტაპი. ის ყოველდღიურად სხვადასხვა ლოკაციაზე რამდენიმე აქციას აანონსებს, რომელსაც სხვა ოპოზიციური ლიდერებიც უერთდებიან. მანვე აღნიშნა, რომ პროტესტი თბილისის გარდა არაერთ ქალაქში იქნება.