ტორესა მოსის დაპატიმრების გასაპროტესტებლად ხვალ, 14 ნოემბერს მწერლებმა აქცია დაგეგმეს. საქართველოს პენცენტრის განცხადებით, ისინი მშვიდობიანი პროტესტის მონაწილე კოლეგის უსამართლო დაპატიმრებას გააპროტესტებენ და სოლიდარობას გამოუცხადებენ მას.

"საქართველოს პენცენტრის წევრი, მწერალი ტორესა მოსი ისევ პატიმრობაში რჩება. არ დაკმაყოფილდა ადვოკატის თხოვნა მისი ხელწერილით გამოშვების თაობაზე. სასამართლო დანიშნულია ხვალ დილის ათი საათიდან. მშვიდობიანად მოპროტესტე კოლეგის უსამართლოდ დაპატიმრების გამო ხვალ, 14 ნოემბერს, მაჩაბლის 13-ში, დილის ათ საათზე გაიმართება ქართველ მწერალთა სოლიდარობის აქცია", — ვკითხულობთ განცხადებაში.

ტორესა მოსი 12 ნოემბერს დააკავეს, როცა გირჩი — მეტი თავისუფლების წევრებმა 6 ქალაქში სახელმწიფო უსაფრთხოების სამსახურის შენობებთან აქციები გამართეს და მანქანებით შესასვლელი ჩახერგეს. ისინი ითხოვდნენ სრულად პროპორციულ 2%-იან საარჩევნო სისტემას, რიგგარეშე არჩევნებს გაზაფხულზე და პრეზიდენტი სააკაშვილის გადაყვანას სამოქალაქო კლინიკაში.

შესასვლელის გასათავისუფლებად სამართალდამცავებმა ევაკუატორით შიგნით მყოფი პოლიტიკოსებიანად მანქანები ადგილიდან გაიყვანეს. აქციებზე 10 პირი დააკავეს.