ოპოზიციური პარტიები, დროა, ევროპული საქართველო, ლელო, გირჩი — მეტი თავისუფლება და დეპუტატი სალომე სამადაშვილი ხელისუფლებას ევროპარლამენტარ ანა ფოტიგას ექსპრეზიდენტის მოსანახულებლად არშეშვების გამო აკრიტიკებს. მათი განცხადებით, მთავრობამ საბოლოოდ ზურგი შეაქცია ევროპას.

"ფოტიგას ვიზიტის მთავარი მიზანი იყო ამ კრიზისში მიხეილ სააკაშვილის მონახულება და მისი მდგომარეობის მონიტორინგი. ხელისუფლებამ ძალიან უხეშად და შეურაცხმყოფელად, ყველანაირი კანონდარღვევით, ჩვენი პარტნიორების და დასავლეთის შეურაცხყოფით, მას უარი უთხრა შესვლაზე ადამიანთან, რომლის სიცოცხლის და ჯანმრთელობის უფლება არის დღეს გათელილი", — განაცხადა ელენე ხოშტარიამ.

სალომე სამადაშვილმა განაცხადა, რომ მაშინ, როცა ხელისუფლება ყველაფერს აკეთებს, რომ დავკარგოთ მეგობრები ევროპაში, ქართველმა ხალხმა თავისი სათქმელი უნდა თქვას, როგორც დღევანდელ აქციაზე, ასევე, სოციალური ქსელის მეშვეობით. მან მოუწოდა მოქალაქეებს, რომ მადლობა გადაუხადონ ანა ფოტიგას ვიზიტისთვის.

"მე მინდა პირველ რიგში მივმართო ჩვენს საზოგადოებას: დღეს საქარველოს ხელისუფლებამ ძალიან ღიად და აშკარად შეაქცია ზურგი ევროპას, შეაქცია ზურგი ჩვენს საუკეთესო მეგობრებს ევროპაში. მე მინდა მოგიწოდოთ ყველას, ვისაც სოციალურ ქსელზე ხელი მიგიწვდებათ, რომ ქალბატონ ანა ფოტიგას მადლობა გადავუხადოთ რაც შეიძლება ბევრმა ადამიანმა, იმ მეგობრობისთვის, რასაც ის უწევს ჩვენს ქვეყანას და მართლა იბრძვის ჩვენი ქვეყნის ევროპული მომავლისთვის", — აღნიშნა სამადაშვილმა.

მისი განცხადებით, უახლოეს მომავალში ქვეყანას ევროპელი პოლიტიკოსების მრავალრიცხოვანი დელეგაცია ეწვევა, რომელთა ვიზიტის მიზანი ექსპრეზიდენტის მდგომარეობის მონიტორინგი და ხელისუფლებაზე სერიოზული წნეხის დაწყებაა, რათა ღიად განაცხადონ, რა არის მათი არჩევანი — ევროპა, თუ რუსეთი.

ენმ-ს წევრის, თინა ბოკუჩავას განცხადებით, საქართველოში ჩამოსული ევროპელი პოლიტიკოსები არ არიან მხოლოდ სააკაშვილის მეგობრები, არამედ საქართველოს მეგობრები არიან და მათთვის უარის თქმა არასწორია. მანვე აღნიშნა, რომ ახლა უმოქმედობა და დუმილი დანაშაულია.

"დღითი დღე ივანიშვილის რეჟიმი საკუთარი სისასტიკით უფრო და უფრო ემსგავსება ლუკაშენკოს ბელარუსს, პუტინის რუსეთს და უკვე ღიად აქცია ზურგი დასავლეთს. უკვე ძალიან ცხადია მათი ანტიდასავლურობა", — განაცხადა მან.

ლელოს წევრის, ანა ნაცვლიშვილის განცხადებით, მთავრობის გადაწყვეტილება არის არა მხოლოდ მიხურული კარი ერთი ევროპარლამენტარისთვის, არამედ ღია პოლიტიკური გზავნილი ევროპისთვის. მისივე თქმით, თუ ხელისუფლებას არ აქვს დასამალი, რა ხდება საპატიმროში, მაშინ ანა ფოტიგა უნდა შეეშვათ.

"ისეთ ვითარებაში, როდესაც არის ორი უკიდურესად განსხვავებული ინფორმაცია იმის შესახებ, სათანადო მკურნალობის გაწევა ხდება თუ არა პატიმარი პრეზიდენტისთვის, ხელისუფლების ინტერესში უნდა ყოფილიყო მიუკერძოებელი მესამე მხარის ჩართვა", — განაცხადა მან.

გირჩის წევრმა, ცოტნე კობერიძემ კი აღნიშნა, რომ იმედს იტოვებდა, ძალაუფლების ან სახის შესანარჩუნებლად ქართული ოცნება ეცდებოდა ცოტა ნორმალურად მოქცეულიყო, თუმცა ასე არ მოხდა და კარგია, რომ დასავლეთიც გაიგებს, რანაირ მთავრობასთან აქვთ შეხება. მან მოუწოდა მოქალაქეებს მივიდნენ დღეს დაგეგმილ აქციაზე და აღნიშნა, რომ ახლა ნიჰილიზმის დრო არ არის.

ევროპული საქართველოს ლიდერმა, გიგა ბოკერიამ თქვა, რომ ასეთი რამ მხოლოდ რუსეთში შეიძლება მოხდეს.

"თუ გადაავლებთ თვალს ამ ქვეყნების ჩამონათვალს, ეს არის ის ქვეყნები, რომლებსაც ღიად აქვთ უარი ნათქვამი თავისუფალი სამყაროს წევრობაზე, რომლებიც არიან იმ ბანაკში, რომელიც უპირისპირდება თავისუფალ სამყაროს, რომლებიც არიან პუტინის რუსეთის ბანაკში. ეს არ არის უტრირება", — განაცხადა მან.

ევროპარლამენტარი ანა ფოტიგა და ლიეტუველი პარლამენტარები საქართველოში 12 ნოემბერს ჩამოვიდნენ. ფოტიგა მოშიმშილე ელენე ხოშტარიას შეხვდა, თუმცა ორი დღის განმავლობაში ვერ შეძლო შესვლა საპატიმროში ექსპრეზიდენტ მიხეილ სააკაშვილის სანახავად.

მმართველ გუნდს არაერთხელ გაუკრიტიკებია ანა ფოტიგა იმ კრიტიკული ტონის გამო, რასაც ევროპარლამენტარი მათდამი იჩენს. პრემიერმინისტრმა კი საარჩევნო კამპანიის დროს განაცხადა, რომ არც ფოტიგა, არც კუბილიუსი მისთვის და ქვეყნისთვის არაფერს არ წარმოადგენენ.