საქართველოში ევროკავშირის ელჩი კარლ ჰარცელი მწუხარებას გამოთქვამს მწერალისა და დიპლომატის, გელა ჩარკვიანის გარდაცვალების გამო. ჰარცელის თქმით, ჩარკვიანმა შთამბეჭდავი მემკვიდრეობა დატოვა საქართველოს ევროპული მომავლისთვის განხორციელებული სამუშაოებით.

"ნება მომეცით, შევუერთდე ქართველთა თაობების მწუხარებას დიდად პატივცემული დიპლომატისა და განმანათლებლის, გელა ჩარკვიანის გარდაცვალების გამო. მან დატოვა შთამბეჭდავი მემკვიდრეობა, მათ შორის საფუძვლიანი სამუშაოები საქართველოს ევროპული ბედის წინსვლისთვის", — წერს ის.

9 ნოემბერს ცნობილი ქართველი მწერალი და დიპლომატი გელა ჩარკვიანი 82 წლის ასაკში გარდაიცვალა. ის 1939 წელს თბილისში დაიბადა. თავისი მრავალწლიანი კარიერის განმავლობაში იყო გადაცემა გლობუსის წამყვანი (1976-1994 წლებში), იყო საქართველოს პრეზიდენტის მრჩეველი საერთაშორისო ურთიერთობათა საკითხებში (1992-2003 წლებში), ასრულებდა საქართველოს საგანგებო და სრულუფლებიანი ელჩის მოვალეობას დიდი ბრიტანეთისა და ჩრდილოეთ ირლანდიის გაერთიანებულ სამეფოში (2006-2009 წლებში) და ამავდროულად თბილისის უცხო ენათა ინსტიტუტსა და თბილისის სახელმწიფო უნივერსიტეტში კითხულობდა ლექციებს ინგლისურ ენასა და სოციოლოგიაში.

გელა ჩარკვიანს სხვადასხვა დროს გამოცემული აქვს ისეთი ცნობილი წიგნები, როგორებიცაა ინტერვიუ მამასთან, ნაგერალა და ნაცნობ ქიმერათა ფერხული.