გასულ წელს საქართველოში მოქმედი კომპანიების 62,8% სოციალურ მედიას საერთოდ არ იყენებდა. ამის შესახებ საქსტატს მიერ გამოქვეყნებულ ანგარიშშია საუბარი, რომელიც საწარმოებში საინფორმაციო-საკომუნიკაციო ტექნოლოგიების გამოყენებას ეხება.

საქსტატის კვლევა აჩვენებს, რომ საწარმოები ძირითადად იყენებდნენ სოციალური მედიის ისეთ სახეებს, როგორიცაა სოციალური ქსელი (Facebook, Linkedin და ა.შ.) — ასეთი კომპანიების წილი 28,5%-ია.

"საწარმოთა 4,1%-ს ჰქონდა საქონლისა და მომსახურების ვებ გაყიდვები, რომელთა 81%-ს შეადგენდა გაყიდვები კერძო მომხმარებლებზე, 16,8%-ს გაყიდვები სხვა საწარმოებზე და 2,2%-ს გაყიდვები საჯარო სექტორზე", — ნათქვამია კვლევაში.

ანგარიშის მიხედვით, 2021 წლის პირველი იანვრის მდგომარეობით, საწარმოებში დასაქმებულთა 32,7% კომპანიის კუთვნილ პორტატულ კომპიუტერს ან სმარტფონს იყენებდა, რომელიც უზრუნველყოფდა ინტერნეტთან კავშირს (მხოლოდ საწარმოს მიზნებისთვის), ხოლო იმ საწარმოთა პროცენტული წილი, რომლებიც იყენებდნენ ვებ-გვერდს ან ვებ-საიტს 19,7% იყო.

კვლევის შედეგების მიხედვით, 2021 წლის პირველი იანვრის მდგომარეობით, საწარმოთა 95%-ს ჰქონდა წვდომა ინტერნეტთან.