People-მა პოლ რადი 2021 წლის ყველაზე სექსუალურ კაცად დაასახელა, მაგრამ მსახიობს ამ ტიტულის მიღება ცოტა უჭირს.

52 წლის რადს ცხოვრების განმავლობაში მრავალი შეფასება მიუღია, მაგრამ სექსუალური? ეს მის წარმოდგენებში დიდად არ თავსდება.

ფოტო: Alexei Hay

"ვიცი, ამას რომ გაიგებენ, ბევრს გაუკვირდება, მაგრამ ეს არ არის ცრუ თავმდაბლობა, რადგან ვფიქრობ, რომ ჩემამდე უამრავი ადამიანია, ვინც ამ ტიტულს იმსახურებს", — ამბობს მსახიობი People-სთან ინტერვიუში.

პოლმა სწორედ ასეთი თავმდაბლობით, კაშკაშა მწვანე თვალებითა და გულწრფელი ღიმილით შეაყვარა თავი მაყურებელს. ის ამჟამად ახალ სერიალში The Shrink Next Door იღებს მონაწილეობას და მალე მსახიობს ფილმში Ghostbusters: Afterlife ვიხილავთ.

ფოტო: People

ახალი წოდებისა და პოპულარობის მიუხედავად, მსახიობი თავს ყველაზე ბედნიერად საკუთარი ოჯახის გვერდით გრძნობს. მისი ცოლი ჯული, რომელთან ერთადაც უკვე 18 წელია, ცხოვრობს, აქამდეც ფიქრობდა, რომ პოლი მსოფლიოში ყველაზე სექსუალური კაცი იყო და ახლა ამ ფაქტზე ხუმრობს, რადგან ეს სამყარომაც აღიარა.

"როცა საკუთარ თავზე ვფიქრობ, პირველ რიგში ქმარი და მამა მახსენდება, რადგან სწორედ ეს ვარ. როცა არ ვმუშაობ, დროს ყოველთვის ოჯახთან ერთად ვატარებ, რადგან ყველაზე მეტად ეს მსიამოვნებს", — აღნიშნა რადმა.

ფოტო: Getty Images

"როგორც იქნა, ჯორჯ კლუნი და ბრედ პიტი სექსუალურ ვახშმებზე დამპატიჟებენ. იმედი მაქვს, რომ იახტით გასასეირნებლად ხშირად მიმიწვევენ. მზად ვარ, ჩემი ცხოვრება ახალ ეტაპზე გადავიყვანო", — ხუმრობს პოლ რადი თავისი ახალი ტიტულით გამოწვეულ "ცვლილებებზე".

სხვადასხვა დროს People-ის მიერ წლის ყველაზე სექსუალურ კაცად დასახელებულა მაიკლ ბი ჯორდანი, დევიდ ბექჰემი, იდრის ელბა, კრის ჰემსვორტი და ბრედლი კუპერი.