ალბათ, ნეტფლიქსის ყველაზე პოპულარული კორეული სერიალის მსოფლიო წარმატების შემდეგ არავის გაგიკვირდებათ, რომ Squid Game-ის მეორე სეზონი ოფიციალურად დადასტურდა. ამის შესახებ სერიალის რეჟისორმა გამოცემა AP Entertainment-თან ინტერვიუში დაადასტურა.

მართალია, რეჟისორი შესაძლო მეორე სეზონსა და სავარაუდო იდეების შესახებ აქამდეც საუბრობდა, თუმცა ეს პირველი შემთხვევაა, როდესაც მან მეორე სეზონის გადაღება ოფიციალურად და პირდაპირ დაადასტურა.

"დიდი წნეხი, მოთხოვნა და სიყვარული გამოხატეთ მეორე სეზონის მიმართ. ვგრძნობ, რომ სხვა გზას არ გვიტოვებთ! ვიტყვი, რომ მეორე სეზონი ნამდვილად იქნება. მასზე ამჟამად ვფიქრობ. ჯერჯერობით დაგეგმვის პროცესში ვარ. მგონია, ჯერ ძალიან ადრეა იმაზე საუბარი, თუ როდის მოხდება ეს. მაგრამ ამას კი გპირდებით: გი-ჰუნი [456-ე მოთამაშე] დაბრუნდება და ის სამყაროსთვის რაღაცას გააკეთებს!", — ამბობს რეჟისორი.

კალმარის თამაში იმ ადამიანებზე მოგვითხრობს, რომლებიც უფულობის გამო სასიკვდილო თამაშში ერთვებიან. სერიალში საბავშვო თამაშები სისხლიან შეჯიბრებადაა ქცეული, თუმცა საპრიზო თანხა მონაწილეებს თამაშის დატოვების ცდუნებას აძლევინებს.

სერიალმა ცოტა ხნის წინ რეკორდი დაამყარა — გამოსვლიდან 25 დღეში 111 მილიონი ნახვით ნეტფლიქსის ყველაზე პოპულარული სერიალი გახდა.

კონკრეტულად როგორ განვითარდება მოვლენები მეორე სეზონში, ეს, როგორც ჩანს, ჯერჯერობით თავად რეჟისორმაც არ იცის. ის კი ფაქტია, რომ სისხლიანი თავგადასავალი და მოულოდნელობები არც მომავალში მოგვაკლდება!

ამავე თემაზე: