ნაციონალური მოძრაობის თავმჯდომარის, ნიკა მელიას განცხადებით, ექსპრეზიდენტ მიხეილ სააკაშვილის დაკავება გულისხმობდა იმას, რომ გაკეთებულიყო მოწოდებები ციხესთან აქციების გასამართად, სადღაც შეჭრისკენ და ამით პროცესს ლეგიტიმაცია დაეკარგა. თუმცა მელიას თქმით, ისინი ხელისუფლების მიერ დაგებულ ხაფანგში არ გაებნენ.

"მიხეილ სააკაშვილის მოტაცება გულისხმობდა იმას, რომ ჩვენ დაგვეკარგა საქციელი. გულისხმობდა იმას, რომ გაკეთებულიყო მოწოდებები ციხესთან აქციების გასამართად, სადღაც შეჭრისკენ და ა.შ. ვიღაცას ეთქვა, რომ მიხეილ სააკაშვილი არიქა კვდება და მოდით, შევიჭრათ და ამით ლეგიტიმაცია დაეკარგა პროცესს, რომელიც მზარდი იქნება და უწყვეტი. ჩვენ არ ვიყიდეთ მათი დაგებული ხაფანგი და მახე, მაგრამ, რა თქმა უნდა, ძალიან მნიშვნელოვანია რომ ვიყოთ გარეთ და ყველა კიდევ შემოგვიერთდეს და შემოგვიერთდეს", — განაცხადა მელიამ.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის N12 პენიტენციური დაწესებულებიდან გლდანის მე-18 დაწესებულების საავადმყოფოში დღეს, 8 ნოემბერს გადაიყვანეს.

მანამდე რუსთავის ციხესთან ვერტმფრენი გამოჩნდა, რის შემდეგაც გავრცელდა ინფორმაცია, რომ მიხეილ სააკაშვილი ციხიდან სამედიცინო დაწესებულებაში გადაყავდათ.

რუსთავის ციხიდან გამოსვლის შემდეგ სააკაშვილის პირადმა ექიმმა, ნიკოლოზ ყიფშიძემ განაცხადა, რომ ანალიზებზე დაყრდნობით კონსილიუმი ერთად ექსპრეზიდენტის კლინიკაში გადაყვანის აუცილებლობაზე შეთანხმდა.