პრემიერმინისტრი, ირაკლი ღარიბაშვილი აცხადებს, რომ 2022 წლისთვის მთლიანი შიდა პროდუქტი ერთ სულ მოსახლეზე 5 500 დოლარს გადააჭარბებს, რაც საქართველოსთვის ისტორიული მაქსიმუმი იქნება. ეს განცხადება ღარიბაშვილმა საკოორდინაციო საბჭოს დასრულების შემდეგ განაცხადა.

"2022 წლისთვის მთლიანი შიდა პროდუქტის მოცულობა დაახლოებით 65 მილიარდს შეადგენს და ეს არის ისტორიული მაქსიმუმი. ასევე მინდა ვთქვა, რომ პირველად და ესეც იქნება ისტორიული მაქსიმუმი მთლიანი შიდა პროდუქტი ერთ სულ მოსახლეზე გაანგარიშებით შეადგენს 5 500 დოლარს. პირველად, ჩვენი ქვეყნის ისტორიაში გადასცდება 5 500 დოლარს", — განაცხადა ირაკლი ღარიბაშვილმა.

მშპ ერთ სულ მოსახლეზე (მიმდინარე ფასებში) ბოლო წლების განმავლობაში:

  • 2017 წელი — 4 358 დოლარი;
  • 2018 წელი — 4 722 დოლარი;
  • 2019 წელი — 4 696 დოლარი;
  • 2020 წელი — 4 274 დოლარი.

პრემიერმინისტრმა მიმდინარე წლის ეკონომიკური ზრდის პროგნოზებზეც ისაუბრა და თქვა, რომ მთავრობის გათვლებით, წელს საქართველოში მინიმუმ 10%-იანი ეკონომიკური ზრდა იქნება. ღარიბაშვილს არ უხსენებია ე.წ. საბაზისო ეფექტი, რაც მიმდინარე წლის ეკონომიკური ზრდის მაჩვენებლებს მნიშვნელოვნად განაპირობებს. შეგახსენებთ, რომ 2020 წელს საქართველოს ეკონომიკა 6,1%-ით შემცირდა, რაც გავლენას ახდენს მიმდინარე წლის ეკონომიკური ზრდის მაჩვენებლებზე.

"წელს ჩვენ გვაქვს უპრეცედენტო ეკონომიკური ზრდა. მთელს რეგიონში კი არა, არამედ ევროპის მასშტაბით. 9 თვის მონაცემებით, 11,3% არის ეკონომიკური ზრდა. ამას გარდა, მე მინდა გითხრათ, რომ ჩვენი გათვლებით, წლის ბოლომდე ამ წელს გვექნება მინიმუმ 10%-იანი ეკონომიკური ზრდა", — განაცხადა ირაკლი ღარიბაშვილმა.

ირაკლი ღარიბაშვილმა ასევე თქვა, რომ გაზრდილი მთლიანი შიდა პროდუქტი მთარობას მეტი პროექტის დაფინანსების შესაძლებლობას მისცემს. პრემიერმინისტრის თქმით, მთავრობის მთავარი საზრუნავი მეტი სამუშაო ადგილის შექმნა იქნება.