მინიატურული ოქროს ბიბლია, რომელიც ოდესღაც შუა საუკუნეების არისტოკრატს ან სამეფო ოჯახს ეკუთვნოდა, ინგლის ქალაქ იორკში ლითონის დეტექტორის საშუალებით აღმოაჩინეს.

ბიბლიის ზომა სულ რაღაც 1,5 სანტიმეტრია, მაგრამ მისი ფასი 134 ათას დოლარს შეიძლება აღემატებოდეს.

ბიბლია ექთანმა ბაფი ბეილმა მეუღლესთან ერთად იპოვა: წყვილმა იორკის მახლობლად ლითონის დეტექტორით მიწების შემოწმება იმიტომ გადაწყვიტა, რომ ტერიტორიას მდიდარი ისტორიული წარსული აქვს. თუმცა აღმოჩენა მაინც მოულოდნელი გამოდგა.

ფოტო: BNPS

"დაახლოებით 13 სანტიმეტრამდე ამოვთხარე და არ მჯეროდა, რომ აქ რამე განსაკუთრებული დამხვდებოდა", — იხსენებს ბეილი. თუმცა მან განსაკუთრებული ობიექტი ნამდვილად იპოვა. ბიბლია მხოლოდ 5 გრამს იწონის, 22-24-კარატიანი ოქროა და მე-15 საუკუნით თარიღდება. მასზე ამოტვიფრულია წმინდა ლეონარდი და წმინდა მარგარეტი, რომლებიც ფეხმძიმეებისა და მუცლადმყოფი ბავშვის მფარველებად ითვლებიან.

ფოტო: BNPS

ტერიტორია, რომელზეც ბიბლია იპოვეს, რიჩარდ III-ის საკუთრებაში იყო და ექსპერტები ვარაუდობენ, რომ ნივთიც მას შეიძლება ეკუთვნოდეს. ოქროს ბიბლია მოოქრულ ლურჯი საფირონის გულსაკიდს შეადარეს, რომელიც ასევე რიჩარდ III-ის ოჯახს ეკუთვნოდა.

ფოტო: Wikimedia Commons

მათი მსგავსების გამო, ოქროს შემფასებელი ექსპერტები ვარაუდობენ, რომ ოქროს ბიბლიის ფასიც საკმაოდ მაღალი იქნება. იორკშირის მუზეუმი ხშირად წინასწარ ყიდულობს ანტიკვარულ ნივთებს, სანამ ისინი აუქციონზე მოხვდება და ეს არც ოქროს ბიბლიის შემთხვევაშია გამორიცხული. ისიც გავითვალისწინოთ, რომ 1992 წელს მუზეუმმა მოოქრულ ლურჯი საფირონის გულსაკიდში 33 მილიონი დოლარი გადაიხადა.

ფოტო: BNPS