"არ ვიცი, მე არ მინახავს მისი ფაფის ჭამა", — ასე პასუხობს ექსპრეზიდენტის, მიხეილ სააკაშვილის მკურნალი ექიმი, ნიკოლოზ ყიფშიძე იუსტიციის მინისტრს, რატი ბრეგაძეს, რომელმაც თქვა, რომ სააკაშვილი ფაფებსა და ნატურალურ წვენებს იღებს.

"არ ვიცი, რა უნდა ვუპასუხო იუსტიციის მინისტრს. არ მინახია მე ფაფა, ჰკითხეთ ბადრაგს, ექიმებს, ექთნებს, ბევრი ხალხია. ყველგან კამერებია", — ამბობს ის.

მისივე თქმით, სააკაშვილის მდგომარეობა საკმაოდ რთულია და ციხეში მკურნალობის გაგრძელება, პრაქტიკულად, შეუძლებელია.

"პრეზიდენტის ჯანმრთელობის მდგომარეობა საკმაოდ რთულია. ახლა იყო კიდევ ერთი კონსილიუმი დანიშნული, იყო ნევროპათოლოგი და ფიზიკური მედიცინის სპეციალისტი. ჩავატარეთ კონსილიუმი, გავსინჯეთ, აღმოჩნდა, რომ კიდევ საჭიროა სამი დამატებითი კონსულტანტის გამოძახება", — აცხადებს ის.

ამასთან, ყიფშიძის განცხადებით, სააკაშვილს, შესაძლოა, ჰქონდეს ანთება თვალის გარშემო, რაც მის მდგომარეობას კიდევ უფრო გაართულებს.

იმის მიუხედავად, რომ სააკაშვილის მკურნალი ექიმი მის დამძიმებულ მდგომარეობაზე საუბრობს, დღეს იუსტიციის მინისტრმა თქვა, რომ ექსპრეზიდენტი სტაბილურადაა და მეტიც, ფაფებსა და ნატურალურ წვენებს იღებს. ამის პარალელურად, ექსპრეზიდენტის ადვოკატის, ნიკა გვარამიას თქმით, მიხეილ სააკაშვილის მდგომარეობა მძიმდება და მოსალოდნელია კოლაფსი. მისივე თქმით, ექსპრეზიდენტის ფსიქიკას და აზროვნებას უკვე ეტყობა სერიოზული კვალი.

სააკაშვილი უკვე 36 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს. ამ ეტაპზე სააკაშვილი უარს ამბობს ექიმების კონსილიუმთან თანამშრომლობაზე.