ექსპრეზიდენტ მიხეილ სააკაშვილის დედა გიული ალასანია უკრაინის პრეზიდენტ ვოლოდიმირ ზელენსკის მიმართავს და სააკაშვილის უკრაინაში დასაბრუნებლად დახმარებას სთხოვს. ალასანია ვიდეომიმართვაში აღნიშნავს, რომ მისი ერთადერთი იმედი ახლა უკრაინაა. ის ამბობს, რომ შიმშილობის 35-ე დღეს ნებისმიერ მომენტში შეიძლება ყველაფერი მოხდეს, ნებისმიერ მომენტში, თუმცა, მისივე თქმით, ეს არავის ანაღვლებს.

"მე მიშა სააკაშვილის დედა ვარ. ჩვენ სასოწარკვეთილ მდგომარეობაში ვართ. შვილს თვალწინ მიკლავენ. მინდა მივმართო პრეზიდენტ ზელენსკის, რომელიც არაერთხელ დაგვეხმარა. მაგრამ ახლა განსაკუთრებით გვჭირდება მისი მხარდაჭერა და დახმარება. საჭიროა ის როგორმე უკრაინაში გადმოვიყვანოთ, რათა აქ შესაბამისი მკურნალობა გაეწიოს და გადარჩეს. ერთადერთი მას ციხის საავადმყოფოში გადაყვანას სთავაზობენ, სადაც შესაბამი სპეციალისტები არ ჰყავთ და არანაირი პირობები არ აქვთ ასეთი პაციენტების მკურნალობისთვის", — ამბობს გიული ალასანია ვიდეომიმართვაში, რომელსაც სააკაშვილის გვერდი ავრცელებს.

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 35 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს.