ჯანდაცვის მინისტრის მოადგილის, თამარ გაბუნიას განცხადებით, მიმდინარეობს მსჯელობა, ხომ არ არის მიზანშეწონილი, რომ ე.წ. ბუსტერ დოზაზე ასაკობრივი ზღვარი მოიხსნას. ამის შესახებ მან დღეს ბრიფინგზე ისაუბრა.

"ამ კვირაში კიდევ მიმდინარეობს მსჯელობა იმაზე, ხომ არ არის მიზანშეწონილი გაფართოვდეს მოიხსნას ასაკობრივი ზღვარი, რადგან მაგალითად, მწეველების შემთხვევაში ესეც დადგენილია, რომ ბუსტერ დოზის ეფექტურობა მაღალია და ჩვენთვის ძალიან რთული იქნება ასაკობრივად გავმიჯნოთ მწეველი არამწეველისგან. ამდენად, რეკომენდაცია შეიძლება მივცეთ, რომ პირს თუ აქვს რაიმე თანმხლები დაავადება მან უნდა ჩაიტაროს ბუსტერ დოზა და ექიმთან შეთანხმებით ნებისმიერი ასაკის პირს თავად შეეძლება ამ გადაწყვეტილების მიღება", — აღნიშნა მან.

საქართველოს მოქალაქეების ნაწილს Covid-19-ის ვაქცინაციის ბუსტერისა და ჩანაცვლების მიღება უკვე შეუძლია. ჯანდაცვის მინისტრის შესაბამისი ბრძანება 11 ოქტომბერს გამოქვეყნდა. ამ ეტაპზე, ბუსტერის ყველასთვის არ არის ნებადართული. სახელმწიფოს პოზიციაა, რომ მოსახლეობის უმრავლესობა ჯერ სრულად უნდა აიცრას პირველი და მეორე დოზით, ხოლო მესამე დოზა მიიღონ მაღალი რისკის ქვეშ მყოფმა პირებმა. ესენი არიან:

  • 50 წლის და უფროსი ასაკის ადამიანები;
  • ხანგრძლივი მოვლის დაწესებულებებში მცხოვრები 16 წელზე მეტი ასაკის პირები,
  • მათი მომვლელები და დაწესებულებაში დასაქმებული პირები;
  • სპეციალური პენიტენციური სამსახურის თანამშრომლები და პენიტენციურ დაწესებულებებში განთავსებული ბრალდებული/მსჯავრდებული 16 წელზე მეტი ასაკის პირები (მოქალაქეობის სტატუსისა და კანონმდებლობით გათვალისწინებული იდენტიფიკაციის დამადასტურებელი დოკუმენტის არქონის მიუხედავად);
  • სამედიცინო პერსონალი;
  • 16-დან 49 წლის ჩათვლით ასაკის პირები, ქრონიკული დაავადებებით. ვაქცინაციის სურვილის შემთხვევაში, აღნიშნულმა პირებმა ამცრელ დაწესებულებებს უნდა წარუდგინონ ჯანმრთელობის მდგომარეობის შესახებ ცნობა — ფორმა №IV-100/ა.

გაიგეთ მეტი: