ჰელოუინის დღესასწაულზე ტოკიოს ერთ-ერთ მატარებელში მყოფ მგზავრებს თავს ჯოკერის კოსტიუმში ჩაცმული 24 წლის კაცი დაესხა. თვითმხილველთა თქმით, უცნობმა ვაგონში გამჭვირვალე სითხე დაასხა და ცეცხლი წაუკიდა. კაცი მგზავრებს თავს დანითაც დაესხა. თავდასხმის შედეგად 17 ადამიანია დაშავებული.

ვიდეოში კარგად ჩანს ეჭვმიტანილის მიერ დანთებული ცეცხლის კვამლი და მგზავრები, რომლებიც ვაგონიდან გამოღწევას ცდილობენ. აღსანიშნავია, რომ 16-მა ადამიანმა მსუბუქი დაზიანება მიიღო, თუმცა ერთი მგზავრი, რომელსაც ეჭვმიტანილმა დაზიანება დანით მკერდის არეში მიაყენა, მძიმედაა.

"თავიდან მეგონა, ჰელოუინთან დაკავშირებული ღონისძიება იყო, მაგრამ როგორც კი გრძელი დანით შეიარაღებული კაცი დავინახე, მაშინვე გავიქეცი. გამიმართლა, რომ არ დავშავებულვარ", — ამბობს ერთ-ერთი თვითმხილველი ადგილობრივ მედიასთან საუბრისას.

ეჭვმიტანილი — 24 წლის კიოტა ჰატორი უკვე დაკავებულია. თვითმხილველთა თქმით, თავდასხმისას მას მწვანე პერანგი და იასამნისფერი კოსტიუმი ეცვა. გავრცელებული ინფორმაციით, მან პოლიციას უთხრა, რომ ჯოკერის გმირი ძალიან უყვარს და ხალხის დახოცვა, შემდეგ კი სასამართლოში სასიკვდილო განაჩენის მიღება სურდა.