საქართველოში, ლატვიის პრეზიდენტის, რაიმონდს ვეიონისის ვიზიტის ფარგლებში, მხარეებმა რამდენიმე ორმხრივ დოკუმენტს მოეწერეს ხელი. დღეს, საქართველოს პრეზიდენტის სასახლეში გიორგი მარგველაშვილისა და რაიმონდს ვეიონისის შეხვედრა და პრესკონფერენცია გაიმართა.

  • შეთანხმება საქართველოს შსს-სა და ლატვიის რესპუბლიკის შსს-ს შორის სასაზღვრო სფეროში თანამშრომლობის შესახებ;
  • ურთიერთგაგების მემორანდუმი საქართველოს მეწარმეობის განვითარების სააგენტოსა და ლატვიის ინვესტიციებისა და განვითარების სააგენტოს შორის;
  • ხელშეკრულებას ერთობლივი საქმიანობის თაობაზე საქართველოს საკაბელო ტელევიზიების კავშირსა და ლატვიის სატელეკომუნიკაციო ასოციაციას შორის;
  • ურთიერთგაგების მემორანდუმი საქართველოს ITC ბიზნეს საბჭოსა და ლატვიის ITC საბჭოს შორის.

პრესკონფერენციაზე სიტყვით პირველი გიორგი მარგველაშვილი გამოვიდა. მან ისაუბრა საქართველო-ლატვიის ურთიერთობებზე. მისი თქმით, საუბარი შედგა რეგიონულ თანამშრომლობაზე, რომელიც ორი ქვეყნის წინაშე დგას. პრეზიდენტმა აღნიშნა, რომ საქართველოსა და ლატვიას შორის შესაძლებელია თანამშრომლობის გაღრმავება ეკონომიკურ, განათლების, მეცნიერების, კულტურისა და სამხედრო სფეროებში:

„მინდა აღვნიშნო ჩვენი ქვეყნების განსაკუთრებული ინტერესი, რომელიც შეეხება შავი ზღვისა და ბალტიის რეგიონის თანამშრომლობას. ამ მიმართულებით ძალიან საინტერესო პროექტები არის შესაძლებელი.“

„მინდა კიდევ ერთხელ აღვნიშნო რომ იმ გზაზე რომელიც ჩვენი ქვეყნის საზოგადოებამ აირჩია, რომელიც არის ევროპული და ევროატლანტიკური ინტეგრაცია, რომლის განხორციელებაშიც ჩვენი მეგობრები გვეხმარებიან რეალურად ჩვენ გვაქვს ერთაინი და ძალიან ნათელი ხედვა. ამ ხედვის კონტექსტში სირთულეს წარმოადგენს ის აგრესიული პოლიტიკა რომელსაც ჩვენი ჩრდილოელი მეზობელი ახორცილებეს. მადლობა ლატვიის პრეზიდენტს, რომელიც ამ მიმართულებითაც ნათელ პოზიციას აფიქსირებს.“ - განაცხადა მარგველაშვილმა.

ლატვიის პრეზიდენტის თქმით კი, ლატვია არის მაგალითი იმის, რომ ფუნდამენტური ტრანსფორმაცია შესაძლებელია. მისივე თქმით, ქვეყანა მზადაა განაგრძოს რეფორმების გამოცდილების გაზიარება ქართველებისთვის. ვეიონისის თქმით, თითოეულ ქვეყანას აქვს უფლება აირჩიოს თავისი საგარეო და უსაფრთხოების პოლიტიკა ყოველგვარი ზეწოლის გარეშე. მისივე განცხადებით, მნიშვნელოვანია, საქართველომ განაგრძოს რეფორმები, განსაკუთრებით სასამართლო, კანონის უზენაესობის, სახელმწიფო მართვის სფეროებში.

ლატვიის პრეზიენტმა დაგმო, პროცესები, რომლებიც, მისი თქმით, საქართველოს ერთიანობას ხელს უშლის :

„ე.წ. საპარლამენტო და საპრეზიდენტო არჩევნები, ასევე, ე.წ. რეფერენდუმი თვითგამოცხადებულ რესპუბლიკებში არალეგალურია და ეწინააღმდეგება საერთაშორისო სამართალს. ლატვია ყოველთვის უჭერდა მხარს საქართველოს სუვერენიტეტსა და ტერიტორიულ მთლიანობას, საერთაშორისოდ აღიარებულ საზღვრებში.“

რაიმონდს ვეიონისმა საქართველოს ევროკავშირის წევრობის პერსპექტივებზეც ისაუბრა და განაცხადა, რომ ამჟამინდელი პოლიტიკური კლიმატი არ არის მზად დიდი გადაწყვეტილებებისთვის, თუმცა, მისივე თქმით, საქართველომ უნდა გააგრძელოს რეფორმების გატარება და ნებისმიერ შემთხვევაში მზად უნდა იყოს იმ დღისთვის, როცა ევროკავშირი და ნატო გადაწყვეტილებას მიიღებს.