მიუხედავად იმისა, რომ კენჭისყრის პროცესი არ დასრულებულა, ქართული ოცნების დეპუტატი, ბექა დავითულიანი აცხადებს, რომ ნაციონალური მოძრაობის კანდიდატმა, ნიკა მელიამ არჩევნები წააგო და ახლა პროვოკაციას ეძებს.

"წააგო ნიკა მელიამ არჩევნები და ახლა დადის და ეძებს პროვოკაციას, დადის და უნდა, რომ მიზეზი იპოვოს. სადაც მივა, ყველგან დახვდებიან, დამთავრებულია", — აცხადებს დავითულიანი.

ამ წუთებში დაძაბულობა და დაპირისპირებაა ვაზისუბნის 62-ე საარჩევნო უბანზე, იქ არ არის ელექტროენერგია და დროებით გაჩერებულია კენჭისყრის პროცესი. აღსანიშნავია, რომ ადგილზე იმყოფება მელია, რომელსაც ფიზიკური შეურაცხყოფა მიაყენეს. როგორც გავრცელებულ კადრებში ვხედავთ, მედიასთან განცხადების გაკეთებისას მას უცნობმა პირმა თავში ხელი ჩაარტყა. ამასთან, იქ მივიდნენ ქართული ოცნების დეპუტატებიც.