ნაციონალური მოძრაობის დეპუტატი, ანი წითლიძე სამართალდამცველებმა საპატრულო პოლიციის მანქანაში ჩასვეს და საარჩევნო უბნიდან გაიყვანეს. მოგვიანებით, ის TV პირველის პირდაპირ ეთერში ჩაერთო და განაცხადა, რომ ზუგდიდის სამმართველოს შენობაში იმყოფება. მისი თქმით, მომხდარი იმას უკავშირდება, რომ უბანზე კარუსელის მცდელობა დააფიქსირეს.

"ზუგდიდის სამმართველოს შენობაში მოგვიყვანეს უბრალოდ მე და ჩემი წარმომადგენელი, რომლებიც დაგვაკავეს. მათ დაგვაკავეს იმიტომ, რომ კარუსელის მცდელობა იყო უბანზე, მივედით და ვითხოვეთ კატეგორიულად, ეს ადამიანები გამოვიჭირეთ რეალურად. ადამიანები ვნახეთ, რომლებიც ატრიალებდნენ კარუსელებს სხვისი პირადობებით და ამას მოჰყვა შეხლა-შემოხლა.

მას შემდეგ, რაც მე მივედი და პოლიცია გამოვიძახე ადგილზე, ქალბატონი კომისიის წვერი ქართული ოცნებიდან, თინა კაკაჩია ჩაიკეტა ოთახში ბიულეტენებთან ერთად და მთელი ნახევარი საათი ჩაკეტილი ოთახში იყო და ნაცვლად იმისა, რომ პოლიციამ გაერკვია, რატომ იყო ჩაკეტილი, მთლიანად გამოაძევეს ჩვენი კომისიის წევრები. ჩვენ ასევე ადგილზე ჩაგვივარდა კაკაჩიას ბლოკნოტი, სადაც სახელი და გვარები იყო საჯარო მოხელეების, სიტყვა-სიტყვით ეწერა, რომ საჯარო მოხელეები, რომლებიც უნდა აიძულონ, ხმა მისცენ ქართულ ოცნებას, მათი შვილები, ოჯახის წევრები", — განაცხადა მან.

დღეს, 30 ოქტომბერს ადგილობრივი თვითმმართველობის არჩევნების მეორე ტური გაიმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.