პრემიერმინისტრი ირაკლი ღარიბაშვილი აცხადებს, რომ ნაციონალური მოძრაობის ზუგდიდის მერობის კანდიდატმა, ანზორ მელიამ არჩევნების მეორე ტურში რომც გაიმარჯვოს, არავითარი აზრი არ აქვს. ღარიბაშვილის თქმით, მელია ისეთს ვერაფერს გააკეთებს, რასაც თავად ვერ გაუკეთებს ხალხს.

"მე როგორც პრემიერმინისტრი ამ ქვეყნის და მოსახლეობის, მინდა მათ ვუთხრა, რომ არავითარი აზრი, არავითარი აზრი, არ აქვს თუნდაც ანზორ მელიას გამარჯვებას ზუგდიდში და რატომ? აი, რა უნდა გააკეთოს ანზორ მელიამ, რასაც მე ვერ გავუკეთებ მათ? მე რასაც ვეტყვი, ჩემს სიტყვას საქმეს მოვაყოლებ და ყველაფერს გავაკეთებ იმისთვის, რომ რეალური საქმე გაკეთდეს და არა მხოლოდ ეს დაპირისპირება, ბოიკოტი, ქაოსი და ალიაქოთი შევიტანოთ ადგილზე", — განაცხადა ღარიბაშვილმა იმედის ეთერში.

პრემიერმინისტრის მხრიდან ანზორ მელიას მისამართით მსგავსი განცხადებები აქამდეც მოგვისმენია. 21 ოქტომბერს ღარიბაშვილმა განაცხადა, რომ მელიას მუნიციპალიტეტის მართვის "წარმოდგენა არ აქვს", ხოლო ქართულ ოცნებას "ღირსეული ზუგდიდელი" და "უწესიერესი კაცი" ჰყავს კანდიდატად. მისი თქმით, იმ შემთხვევაში, თუ მელია გაიმარჯვებს, შეუძლებელი იქნება მასთან ურთიერთობა და მოხდება ცენტრალურ ხელისუფლებასთან კომუნიკაციის წყვეტა, ეს კი ზუგდიდელებს დააზარალებს.