ქართული ოცნების წევრის, ირაკლი ზარქუას განცხადებით, ნაციონალური მოძრაობის თავმჯდომარე და თბილისის მერობის კანდიდატი ნიკა მელია იძულებული გახდება, დატოვოს პარტია ან დროას ლიდერ ელენე ხოშტარიასა და ლელოს ლიდერ მამუკა ხაზარაძესთან ერთად 4%-იანი პარტიის ლიდერი იქნება. ზარქუას თქმით, თავად მიხეილ სააკაშვილმა და "სააკაშვილის ტელევიზიამ" მელია გაწირეს, რადგან მთავარი არხის დაკვეთით ჩატარებულ IPSOS-ის წინასაარჩევნო კვლევის მიხედვითაც კი ის ვერ იგებს.

"ახლა ვისმენდი ბატონი მელიას ვირტუალურ მთავრობას. სასაცილოა ხო? მე ხომ ამას ვაფრთხილებდი მელიას, სააკაშვილი და სააკაშვილის ტელევიზია გაწირავდა მას და გაწირეს. ახლა იხტუნაოს იქით-აქეთ. რაც გითხარით, რომ ის იძულებული გახდება დატოვოს ნაციონალური მოძრაობა ან წავა სახლში, პოლიტიკას ჩამოშორდება ან ქალბატონ ხოშტარიასთან, რომელიც 1%-იანია და ბატონ ხაზარაძესთან, რომელიც თუ არ ვცდები 3%-იანია, 4%-იანი პარტიის ლიდერი იქნება. აი, ეს არის მისი დასასრული. ამას ჩვენ ვაფრთხილებდით, როდესაც სააკაშვილის არაჯანსაღ, ანტისახელმწიფოებრივ თამაშებში ჩაერთო", — განაცხადა ზარქუამ პალიტრანიუსთან.

მთავარი არხის დაკვეთით IPSOS-ის მიერ ჩატარებული კვლევით თვითმმართველობის არჩევნების მეორე ტურში ქართული ოცნების კანდიდატი ლიდერობს.

20 ოქტომბერს ნიკა მელიამ თბილისის მთავრობის ჩრდილოვანი კაბინეტი წარადგინა. ოპოზიციის გამარჯვების შემთხვევაში თბილისის მერის მოადგილეები იქნებიან მამუკა ხაზარაძე, ელენე ხოშტარია, ზურაბ ჯაფარიძე და ირაკლი აბესაძე.