შრომის ინსპექციის ინფორმაციით, ვრცელლდება ცნობები, რომ გარკვეული ჯგუფი მათი სახელით ახორციელებს ფიზიკური თუ იურიდიული პირების ინსპექტირებას და დაჯარიმების მუქარით, ფულს სძალავს მოქალაქეებს.

"სოციალური ქსელის მეშვეობით ფართოდ გავრცელდა ცნობები, რომ გარკვეულ პირთა ჯგუფი სარგებლობს საქართველოს შრომის, ჯანმრთელობისა და სოციალური დაცვის სამინისტროსა და სსიპ-შრომის ინსპექციის სამსახურის სახელით, იყენებს სახელმწიფო სიმბოლიკის მსგავს საცნობ ნიშნებს და მათი უფლებამოსილებების შესახებ ფიზიკურ და იურიდიულ პირთა შეცდომაში შეყვანის გზით, შრომის უსაფრთხოების საკითხებზე ახორციელებს ცალკეული სუბიეტების ინსპექტირებას და დაჯარიმების მუქარით, ახდენს სუბიექტებისაგან თანხების გამოძალვას.

შრომის ინსპექციის სამსახურში შემოსულია რამდენიმე ოფიციალური განაცხადი ანალოგიური ხასიათის ქმედების სხვადასხვა დროს და სხვადასხვა პირთა მიმართ განხორციელების თაობაზე, რაც შესაძლოა შეიცავდეს დანაშაულის ნიშნებს და მოითხოვს დამატებით სამართლებრივ რეაგირებას", — აცხადებენ შრომის ინსპექციაში.

უწყება მოქალაქეებს მოუწოდებს გამოიჩინონ სიფრთხილე და თუ მათ ვინმე გაეცნობა, როგორც შრომის ინსპექციის წარმომადგენელი, მოსთხოვონ უფლებამოსილების დამადასტურებელი დოკუმენტები. კონკრეტულად, შრომის ინსპექტორის ბრძანება ინსპექტირების განხორციელების თაობაზე და სამსახურებრივი მოწმობა.