ბათუმის ერთ-ერთი საჯარო სკოლის მე-8 კლასის მოსწავლეები თანატოლს აბულინგებენ. მოსწავლეებს შორის დაპირისპირების ამსახველი ვიდეო სოციალურ ქსელში გავრცელდა. ვიდეოში ჩანს, რომ ერთი არასრულწლოვანი მეორეს შეურაცხყოფას აყენებს, უცენზურო სიტყვებით მიმართავს და აიძულებს თქვას ის, რასაც ავალებენ. არასრულწლოვანს თანატოლები ცემითაც ემუქრებიან.

"მითხარი-თქო, რა ხარ, კიდე გაიმეორე, თორე დაგარტყამ კიდევ ერთხელ, შენი დედა მოვ**ან", — ეუბნება მოსწავლე თანატოლს.

ფორმულას ინფორმაციით, შემთხვევა ბათუმის ბულვარის ერთ-ერთ რესტორანში მოხდა.

შინაგან საქმეთა სამინისტროში On.ge-ს განუცხადეს, რომ როგორც კი უწყებისთვის ფაქტის შესახებ გახდა ცნობილი საგამოძიებო ღონისძიებები დაუყოვნებლივ დაიწყო და ჩატარდა გამოკითხვები, მათ შორის არასრულწლოვნების. შსს ამბობს, რომ საგამოძიებო მოქმედებები კანონის სრული დაცვით — მშობლებთან და სოც მუშაკთან ერთად ჩატარდა.

მათივე ცნობით, საქმეზე გამოძიება სისხლის სამართლის კოდექსის 151-ე მუხლით დაიწყო, რაც მუქარას გულისხმობს.

მომხდართან დაკავშირებით On.ge განათლების სამინისტროსაც დაუკავშირდა. უწყებაში გვითხრეს, რომ საკითხს მოიკვლევენ და გაგვაგებინებენ. მათგან პასუხის მიღების შემთხვევაში მასალა განახლდება.