საკულტო სიტკომ Friends-ში (მეგობრები) განთერის, Central Perk-ის მიმტანი, როლის შემსრულებელი, ჯეიმს მაიკლ ტაილერი 59 წლის ასაკში გარდაიცვალა.

2021 წლის ივნისში NBC-თან მიცემულ ინტერვიუში მსახიობმა განაცხადა, რომ 2018-ში პროსტატის მეოთხე სტადიის კიბო დაუდგინდა და ბოლო წლებში ამ დიაგნოზს ებრძოდა.

გასულ მაისს ჯეიმს მაიკლ ტაილერმა სიტკომის დანარჩენ ვარსკვლავებთან ერთად მეგობრების სპეციალურ სერიაში მიიღო მონაწილეობა, თუმცა ჯანმრთელობის მდგომარეობის გამო ფიზიკურად დასწრება ვერ შეძლო და Zoom-ის საშუალებით ჩაერთო შოუს.

"ეს გულწრფელად ჩემი ცხოვრების ყველაზე დასამახსოვრებელი ათი წელი იყო", — განაცხადა მან მაშინ იმ ლეგენდარულ სერიალზე საუბრისას, რომლის სახასიათო ნაწილი თავადაც იყო.

მოგვიანებით ტაილერმა იმაზეც ისაუბრა, თუ რატომ არ გაამხილა უფრო ადრე საჯაროდ თავისი დიაგნოზი:

"არ მინდოდა, ისეთი რეაქცია ყოფილიყო: ოჰ, განთერს თურმე კიბო აქვს".

ჯეიმს მაიკლ ტაილერის გარდაცვალებას მეგობრების ტვიტერის ოფიციალურ ანგარიშზეც გამოეხმაურნენ:

"Warner Bros. Television მწუხარებას გამოხატავს ჯეიმს მაიკლ ტაილერის გარდაცვალების გამო, რომელიც ყველასთვის საყვარელი მსახიობი და მეგობრების ოჯახის განუყოფელი ნაწილი იყო", — ვკითხულობთ ტექსტში.