პრემიერმინისტრი ირაკლი ღარიბაშვილი ტყუილს უწოდებს გავრცელებულ ინფორმაციას სპეცრაზმის მობილიზების შესახებ. მან მთავარი არხის გენერალურ დირექტორს, ნიკა გვარამიასა და ნაციონალური მოძრაობის თავმჯდომარეს პროვოკატორი უწოდა. მისი თქმით, ამ ინფორმაციის გავრცელების მიზანი მოსახლეობის დაძაბვაა.

"სრული ისტერია, პანიკა დათესეს ერთ-ერთმა ყველაზე ბინძურმა პროვოკატორმა, გვარამიამ, მელიამ და ყველა ამ ქაოსის შემომტანმა ადამიანებმა. არარსებული ამბავი გამოიგონეს, სრული ტყუილი, რომ თითქოს ჩვენ, ჩემი დავალებით ვაპირებდით სპეცრაზმის გაგზავნას სამეგრელოში, სადამსჯელო ოპერაციების ჩატარებაზე [...] ეს უკავშირდებოდა, რა თქმა უნდა, იმას, რომ დაძაბონ სამეგრელოს მოსახლეობა", — განაცხადა ირაკლი ღარიბაშვილმა.

ღარიბაშვილი ამტკიცებს, რომ ქვეყანაში ძალადობის დრო დამთავრდა.

"ადამიანი თავისი გარყვნილი გონებიდან გამომდინარე აზროვნებს. ალბათ, თვითონ როგორც მოიმოქმედებდნენ, რას დაგეგმავდნენ, აი, აქედან გამომდინარე ააგეს ეს აბსურდული პანიკა [...] ძალადობის დრო ქვეყანაში არის დამთავრებული. აქ რევოლუციას და არეულობას ვერავინ ვერ მოაწყობს", — განაცხადა ღარიბაშვილმა.

რამდენიმე წუთის წინ განცხადება გაავრცელა სახელმწიფო უსაფრთხოების სამსახურმა. უწყებაში აცხადებენ, რომ სპეცდანიშნულების რაზმის არცერთ თანამშრომელს თავისი მუდმივი დისლოკაციის ადგილი არ დაუტოვებია.

სპეცრაზმის მობილიზების შესახებ ინფორმაცია გუშინ ღამიდან ვრცელდება. მთავარი არხის ინფორმაციით, გორში, იმერეთსა და ზუგდიდში მობილიზაციაა გამოცხადებული და სპეციალური დანიშნულების რაზმის წარმომადგენლები ყაზარმულ რეჟიმზე გამოიძახეს. ნაციონალური მოძრაობის თავმჯდომარე ნიკა მელია აცხადებს, რომ ხელისუფლება ზუგდიდსა და თბილისში დაკავებებს გეგმავს. მისი თქმით, ამის შესახებ ქვეყანაში აკრედიტირებულ ყველა წამყვან ელჩს აცნობეს.