თბილისის მერისა და მერობის კანდიდატის, კახა კალაძის განცხადებით, ექსპრეზიდენტ მიხეილ სააკაშვილს იმ კანონებით რომ მიდგომოდნენ, რა კანონებიც სააკაშვილის დროს იყო, ციხეში 30 წლის გატარება მოუწევდა. მისივე თქმით, სააკაშვილის პენიტენციურ დაწესებულებაში ყოფნა ქვეყნისთვის სწორი გადაწყვეტილებაა.

"თუ ჩვენ დავიწყებთ იმგვარ მიდგომებს, რომ ადამიანური და პოლიტიკური ფაქტორი ჩაერიოს ამ ყველაფერში, მაშინ ევროპული ქვეყანა ვერ ვიქნებით. პატივი უნდა ვცეთ კონსტიტუციას და ჩვენს კანონებს. თუმცა, ხაზი მინდა გავუსვა — იმ კანონებით რომ მივდგომოდით, რა კანონებიც მიხეილ სააკაშვილის მმართველობის დროს იყო, დღეს მას 30 წელი მოუწევდა ციხეში ყოფნა", — თქვა კალაძემ რუსთავი 2-თან.

რაც შეეხება უცხოელების განცხადებებს ამასთან დაკავშირებით, კალაძის თქმით, მთავარი ამოსავალი წერტილი საქართველოს კონსტიტუცია და ქვეყნის კანონმდებლობა უნდა იყოს.

"ნამდვილად არ სიამოვნებს არავის, თუნდაც სააკაშვილის ციხეში გაშვება, ნამდვილად არ მიხარია, მაგრამ არც ის მიხაროდა, რომ წლების წინ, 2012 წლამდე ოჯახებს აუბედურებდნენ, ახალგაზრდებს ქუჩაში ხოცავდნენ და მოკლულ ადამიანებს სახურავზე ყრიდნენ, გირგვლიანების ოჯახი ამოწყვიტეს და სულხან მოლაშვილის ოჯახი გააუბედურეს. შესაბამისად, ამ ადამიანს მოუწევს პასუხისგება იმ ჩადენილ დანაშაულებზე, რომელიც მათი რეჟიმის დროს განხორციელდა," — აცხადებს კალაძე.

მიხეილ სააკაშვილი პირველ ოქტომბერს დააკავეს. ის დაკავების დღიდან, 22 დღეა შიმშილობს. პროკურატურის განცხადებით, მას წარედგინება ბრალი საზღვრის უკანონო კვეთაზე. უწყების ვერსიით, სააკაშვილი საქართველოში უკრაინიდან გემით შემოვიდა ფოთის პორტში.