ექსპრეზიდენტ მიხეილ სააკაშვილის მხარდამჭერებმა ჭორვილაში აქცია გამართეს. ისინი ქართული ოცნების დამფუძნებლის, ბიძინა ივანიშვილის სახლთან მისვლას ცდილობდნენ, თუმცა პოლიციამ გზა გადაუკეტა.

მოძრაობა #მიშასთავისუფლებისთვის წევრებმა გაშალეს ბანერი წარწერით: "თავისუფლება საქართველოს მესამე პრეზიდენტს", ასევე "მიშა მაგარია" ჩართეს და საქართველოს ჰიმნი იმღერეს.

ადგილზე მათ კონტრაქცია დახვდათ, მმართველი გუნდის მხარდამჭერები მათ სიტყვიერ შეურაცხყოფას აყენებდნენ და მოითხოვდნენ, რომ ტერიტორია დაეტოვებინათ. პოლიციის კორდონს მიღმა მყოფებს სააკაშვილის მხარდამჭერები მიმართავდნენ, რომ ერთმანეთის მიმართ ზიზღის გამოხატვა არასწორია.

მოძრაობა #მიშასთავისუფლებისთვის ინტენსიურად მართავს აქციებს ექსპრეზიდენტის მხარდასაჭერად. ისინი ხშირად იკრიბებიან რუსთავის ციხესთან, სადაც სააკაშვილია დაპატიმრებული.