ეროვნული ბანკის შეფასებით, 2021 წლის იანვარ-სექტემბერში ტურიზმიდან 866 მლნ დოლარის შემოსავალი მივიღეთ, რაც გასული წლის შესაბამისი პერიოდის მონაცემს 73,5%-ით აღემატება. აქვე უნდა ითქვას, რომ მიმდინარე წელს მიღებული ტურისტული შემოსავლები 2019 წლის იმავე პერიოდის მაჩვენებელს 66,5%-ით ჩამორჩება.

ასეთია ტურიზმიდან მიღებული შემოსავლები წლების მიხედვით, იანვარ-სექტემბერი

ფოტო: NBG / On.ge

წყარო: ეროვნული ბანკი

თუ თვეების მიხედვით მონაცემებს შევხედავთ, ვნახავთ, რომ წელს ყველაზე მეტი მოცულობის ტურისტული შემოსავალი ივლისში მივიღეთ ($205 მლნ). აგვისტოში ტურიზმმა $199 მლნ, ხოლო სექტემბერში $162 მლნ მოგვიტანა.

აღსანიშნავია, რომ ტურიზმიდან მიღებული შემოსავლები 2020 წელს დრამატულად, $541,7 მილიონამდე შემცირდა, რის შედეგადაც 2019 წლის მონაცემთან ($3,3 მილიარდი) შედარებით 83%-იანი კლება დაფიქსირდა.

ბუნებრივია, ტურისტული შემოსავლები ვიზიტორების რაოდენობაზეა დამოკიდებული. ოფიციალური სტატისტიკის მიხედვით, მიმდინარე წლის პირველ ცხრა თვეში საქართველოში სულ 1 188 234 უცხოური ვიზიტი განხორციელდა, რაც გასული წლის იმავე პერიოდის მაჩვენებელს 13,2%-ით, ხოლო 2019 წლის იანვარ-სექტემბრის მონაცემს 80,1%-ით ჩამორჩება.

მხოლოდ სექტემბერში უცხოელმა ვიზიტორებმა 226 662 ვიზიტი განახორციელეს. ეს მონაცემი 2020 წლის იმავე თვესთან შედარებით 349%-ით მეტია, ხოლო 2019 წლის სექტემბერთან — 71%-ით ნაკლები.

აღსანიშნავია, რომ 2020 წლის დრამატულად შემცირებულ მონაცემებთან შედარებით ბოლო თვეების განმავლობაში როგორც ვიზიტების, ასევე ამ ვიზიტებიდან მიღებული შემოსავლების მატება შეინიშნება, თუმცა არსებული სტატისტიკით, ტურიზმის მაჩვენებლები პანდემიამდელ მონაცემებს მნიშვნელოვნად ჩამორჩება.

გაიგეთ მეტი: