იუსტიციის მინისტრის, რატი ბრეგაძის განცხადებით, საქართველომ 2008 წლის აგვისტოს ომის საქმეზე სტრასბურგის სასამართლოში კიდევ ერთი საქმე მოიგო. კერძოდ, ბრეგაძის განმარტებით, ევროპულმა სასამართლომ დაუშვებლად ცნო ცხინვალის რეგიონის მაცხოვრებლების საჩივრები, რომლებიც ქართულ მხარეს მათი უფლებების დარღვევაში ადანაშაულებდა.

ბრეგაძის განმარტებით, სტრასბურგის სასამართლომ სრულად გაიზიარა ქართული მხარის არგუმენტები, რომ ომის დროს ცხინვალის რეგიონი იბომბებოდა რუსეთის ფედერაციის მხრიდან და საქართველოს შეიარაღებული ძალები არ ახორცელებდა კონტროლს ამ რეგიონსა და მიმდებარე ტერიტორიაზე. მისი თქმით, სასამართლომ გადაწყვიტა, რომ ამ ფაქტორიდან გამომდინარე, შეუძლებელია რაიმე დარღვევა შეერაცხოს საქართველოს.

"სახელმწიფო ინტერესების დასაცავად 2019-20 წლებში საქართველოს იუსტიციის სამინისტრომ, საქართველოს გენერალურ პროკურატურასთან, საქართველოს თავდაცვის სამინისტროსა და საქართველოს სახელმწიფო უსაფრთხოების სამსახურთან ერთად მოიძია და ევროპულ სასამართლოში წარადგინა ასობით მტკიცებულება შესაბამის სამართლებრივ არგუმენტაციასთან ერთად, რითაც დასტურდებოდა, რომ 2008 წელს საქართველოს არ დაურღვევია საერთაშორისო სამართლის ნორმები", — განაცხადა მან ბრიფინგზე.

მინისტრის თქმით, ამ განჩინებით კიდევ ერთხელ დადასტურდა, რომ დეოკუპაციისა და სამართლიანობისთვის ბრძოლა გრძელდება მშვიდობიანი და სამართლიანი მეთოდებით.

21 იანვარს ადამიანის უფლებათა ევროპული სასამართლოს დიდმა პალატამ აგვისტოს 2008 წლის ომზე საქართველოს ყველა ძირითადი სარჩელი დააკმაყოფილა. კერძოდ, სტრასბურგის სასამართლომ გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა.

სასამართლოს დიდმა პალატამ, კონვენციის მე-4 მუხლის შესაბამისად, რაც სიცოცხლის უფლებას გულისხმობს, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.