კინოს მოყვარულები მოუთმენლად ელიან კვენტინ ტარანტინოს შემდეგი ფილმის ხილვას, რადგან თანამედროვეობის ეს ერთ-ერთი ყველაზე სახელოვანი კინოხელოვანი ხშირად გვაფრთხილებს, რომ რეჟისორის კარიერის დასრულებას აპირებს.

ტარანტინო ცოტა ხნის წინ იტალიაში, კერძოდ რომის კინოფესტივალზე იმყოფებოდა, სადაც საპატიო ჯილდო გადასცეს. სწორედ ამ ცერემონიის დასრულების შემდეგ ჟურნალისტებთან გამართულ შეხვედრაზე განაცხადა, რომ ზუსტად არ იცის, თუ რა იქნება მისი შემდეგი ფილმი, მაგრამ კითხვაზე, შეიძლება თუ არა, რომ ეს იყოს Kill Bill 3 (მოკალი ბილი 3), რეჟისორმა შემდეგნაირად უპასუხა:

"რატომაც არა".

კვენტინ ტარანტინომ იმ სამომავლო გეგმებზეც ისაუბრა, რომელთა განხორციელებაც უნდა: მათ შორისაა კინოს შესახებ წიგნის დაწერა და სერიალის გადაღება. თუმცა აღმოჩნდა, რომ ყველაზე მეტად მაინც კომედიაზე მუშაობა სურს.

"როგორც მაინცდამაინც შემდეგი ფილმი არა, მაგრამ ამ რაღაცის გადაღებაზე ვფიქრობ და მასზე ბევრი რამის თქმას არ ვაპირებ, გარდა იმისა, რომ ის ნაწილობრივ სპაგეტი ვესტერნი (ევროპული ვესტერნი) იქნება. ერთი სული მაქვს, როდის შევძლებ ამ იდეის განხორციელებას, რადგან ის ძალიან სასაცილო იქნება: ვესტერნის ჟანრის ფილმი, რომელშიც ყველა სხვადასხვა ენაზე ილაპარაკებს", — აღნიშნა მან.

კვენტინ ტარატინოს ჯერჯერობით ბოლო ფილმი ერთხელ ჰოლივუდში 2019 წელს გამოვიდა.

ფოტო: SONY PICTURES

მნიშვნელოვანია, რომ ტარანტინომ მოკალი ბილის მესამე ნაწილის გადაღების შესაძლებლობაზე აქამდეც, მაგალითად, 2019 წელსაც ისაუბრა. შემდეგში იმის ალბათობაც არ გამორიცხა, რომ ახალ ფილმში, შესაძლოა, უმა თურმანის შვილიც კი ვიხილოთ.

მოკლედ, როგორც ხდება ხოლმე, ტარანტინოა და წინასწარ მის შესახებ ვერაფერს ვივარაუდებთ, სანამ თავად არ გადაწყვეტს ტრადიციულად ჩვენს გაოცებას.