ჰოლივუდში არც ისე იშვიათია ისეთი შემთხვევები, როდესაც მსახიობები წინასწარ ვერ აფასებენ ფილმისა თუ სერიალის პოტენციალს, რის გამოც როლზე უარს ამბობენ, შემდეგ კი გადაწყვეტილებას ძალიან ნანობენ. მსგავსი გამოცდილება თანამედროვეობის ერთ-ერთ ყველაზე ცნობილ მსახიობ ედრიენ ბროუდისაც აქვს. რაც არ უნდა გასაკვირი იყოს, მსახიობმა თვით ლეგენდარულ ბეჭდების მბრძანებელზე თქვა უარი.

ერთ-ერთ ინტერვიუში ხანგრძლივი და გამორჩეული ფილმებით სავსე კარიერის შესახებ საუბრისას ედრიენ ბროუდიმ პიტერ ჯექსონის 2005 წლის კინგ კონგში თამაშზე ისაუბრა. მოგვიანებით კი ჯექსონის ყველაზე ცნობილი ნამუშევარი — ბეჭდების მბრძანებელი და ფილმში მონაწილეობაზე უარის თქმა გაიხსენა.

"არ ვიცი, რომელ როლს მომცემდნენ, თუმცა ჰობიტის მსგავსი პერსონაჟი უნდა განმესახიერებინა. იმ დროს რაღაც სხვას ვეძებდი", — ამბობს ბროუდი.

რა თქმა უნდა, როგორც კი ბეჭდების მბრძანებელი ნახა, გადაწყვეტილება მაშინვე ინანა.

"მახსოვს, რომ ბეჭდების მბრძანებლის სანახავად კინოთეატრში ყოფილ შეყვარებულთან ერთად წავედი. ის მომიბრუნდა და მითხრა: 'ბეჭდების მბრძანებელზე უარი თქვი?' მახსოვს, რომ თავი იდიოტად ვიგრძენი," — იხსენებს მსახიობი.

მართალია, ბეჭდების მბრძანებელს ნამდვილად არაფერი დაეწუნება, თუმცა უნდა ვაღიაროთ, რომ ფილმში ედრიენ ბროუდის ხილვაზე უარს ნამდვილად არ ვიტყოდით!