ქართული ოცნების დეპუტატის, ანრი ოხანაშვილის განცხადებით ყველამ პატივი უნდა სცეს სამართლებრივი სახელმწიფოს პრინციპს. ასე გამოეხმაურა ის ევროპელი პოლიტიკოსების ღია წერილს. მან ასევე აღნიშნა, რომ ისინი "შეცდომაში არიან შეყვანილნი".

"ან შეცდომაში არიან ისინი შეყვანილნი, ან ჩამოვიდნენ და პირადად გაეცნონ იმ ფაქტობრივ გარემოებებს, ცოცხალ მოწმეებს, ადამიანებს, ვინც არიან მსხვერპლები, ვინც არიან დაზარალებულები და ნახავენ, რასთან გვაქვს საქმე.

ამიტომ ისეთ განცხადებას და ისეთ პოზიციას ნუ დაიკავებენ, რომელიც მათი სტრატეგიული პარტნიორი ქვეყნის მოქალაქეებს მიაყენებს შეურაცხყოფას. და ეს სხვა არაფერია, თუ არა ჩვენი მოქალაქეებისთვის და განსაკუთრებით, მსხვერპლი, დაზარალებული პირებისთვის შეურაცხყოფა. კეთილი ინებონ და ყველამ პატივი სცეს სამართლებრივი სახელმწიფოს პრინციპს", — თქვა ოხანაშვილმა.

დღეს, 18 ოქტომბერს ევროპარლამენტარების, ყოფილი პრეზიდენტების, ელჩების, მინისტრების ღია წერილი გავრცელდა, სადაც აღნიშნულია, რომ მიხეილ სააკაშვილი პატიმრობიდან უნდა გათავისუფლდეს, სანამ მისთვის წაყენებული ბრალდებებისთვის სამართლიან სასამართლო პროცესზე წარსდგება.

ღია წერილს ხელს აწერენ ევროპარლამენტარები: ანა ფოტიგა, რასა იუკნევიჩიენე, ანა ზალევსკა, რაფაელ გლუკსმანი და ა.შ. ლატვიის, უკრაინის ყოფილი პრეზიდენტები: ვალდის ზატლერსი და ვიქტორ იუშენკო; შვედეთის ყოფილი პრემიერმინისტრი, კარლ ბილდტი; საქართველოს საგარეო საქმეთა ყოფილი მინისტრი, ეკა ტყეშელაშვილი; თავდაცვის ყოფილი მინისტრი, დავით სიხარულიძე; ოპოზიციონერი პოლიტიკოსები: ელენე ხოშტარია, ბათუ ქუთელია და სხვები.