ქართული ოცნების ერთ-ერთი ლიდერი, არჩილ თალაკვაძე აცხადებს, რომ ეკლესიაზე თავდასხმა არის ნაციონალური მოძრაობისა და "მისი პროპაგანდისტული არხების" ერთ-ერთი მთავარი ამოცანა. ასე გამოეხმაურა ის მიტროპოლიტ შიო მუჯირის კრიტიკას.

"თანამოსაყდრე შიოსთან მიმართებაში ჩვენ ვნახეთ მართლაც სიძულვილით აღსავსე შეფასებები. შეფასებები, რომლებიც უსამართლოა და პირდაპირ გეტყვით, რომ არის მიმართული ეკლესიის დისკრედიტაციისკენ [...]

ეკლესიაზე თავდასხმა, ეს არის ნაციონალური მოძრაობის და მისი პროპაგანდისტული არხების ერთ-ერთი მთავარი ამოცანა. მოგეხსენებათ, რომ წლების განმავლობაში, ზუსტად ეს ადამიანები, ნაციონალური მოძრაობა მათი პოლიტიკური, პარტიული პროდიუსერები აქტიურ კამპანიას აწარმოებენ საქართველოს ეკლესიის წინაშე", — განაცხადა არჩილ თალაკვაძემ.

გუშინ, 17 ოქტომბერს, საკვირაო ქადაგებისას სენაკისა და ჩხოროწყუს მიტროპოლიტმა, შიო მუჯირმა განაცხადა, რომ როცა "საყოველთაო შერიგებაზე" საუბრობენ, არასწორად განმარტავენ ქრისტიანულ სწავლებას.

"ყველას ყველაფერი უნდა აპატიო, ყოველთვის ყველას უნდა შეურიგდე. ასეთი რამ სახარებაში არ გვიწერია ჩვენ", — განაცხადა მუჯირმა.

"საყოველთაო შერიგებაზე" განცხადება ექსპრეზიდენტ მიხეილ სააკაშვილთან მიმართებით რამდენიმე სასულიერო პირმა გააკეთა. მათ შორისაა, ახალქალაქის, კუმურდოს და კარის მიტროპოლიტი, ნიკოლოზ ფაჩუაშვილი. ასევე, მარგვეთისა და უბისის მიტროპოლიტი მელქისედეკ ხაჩიძე.